Tags-Duniya

guzrī jaatī hai har tarah se
duniyā guzrān sar-ba-sar hai

duniyā se kar ke pyaar lagā.eñge qahqahe
ġham par hazār baar lagā.eñge qahqahe

duniyā hañsnegī apnī himāqat pe jab kabhī
ham aur be-shumār lagā.eñge qahqahe

jalva-e-arbāb-e-duniyā dekhiye
svāñg hai ye bhī tamāshā dekhiye

ai parastārān-e-duniyā dil kī duniyā hai kuchh aur
kaun Thokar khaa.e bin rahtā hai us kī raah meñ

terī ḳhātir jab maiñ duniyā bhuul gayā huuñ
tujh ko bhī to yaar bhulāyā jā saktā hai

ajab mizāj kī duniyā hai ye ki is ke liye
ḳharāb achchhā to achchhā ḳharāb hotā hai

duniyā kā ye e.azāz ye in.aam bahut hai
mujh par tire ikrām kā ilzām bahut hai

duniyā to ham se haath milāne ko aa.ī thī
ham ne hī e.atibār dobāra nahīñ kiyā

ham shab-e-hijr meñ jab sotī hai saarī duniyā
zikr karte haiñ tirā chhiTke hue tāroñ se

ahl-e-duniyā se ye kahte haiñ mire nāla-e-dil
ham sadā deñge ġham-e-hijr ke mīnāroñ se

kyā haqīqat hai kār-e-duniyā kī
kyā munāfā hai is ḳhasāre meñ

rāt-din josh-e-junūñ se kaam honā chāhiye
ishq kī duniyā meñ apnā naam honā chāhiye

tum ko ham dil meñ basā leñge tum aao to sahī
saarī duniyā se chhupā leñge tum aao to sahī

qalb o zamīr be-his o be-jān ho ga.e
duniyā ḳhulūs o dard se mahrūm ho ga.ī

mujh se bach bach ke chalī hai duniyā
mere nazdīk ḳhudā ho jaise

is tarah duniyā hai ik ma.amūra-e-nāz-o-niyāz
zarre zarre par mirā sajda tumhārā naam hai

haañ nahīñ 'sīmāb' mujh ko apnī hastī par ġhurūr
jāntā huuñ maiñ mirī duniyā fanā-anjām hai

badlīñ jo karvaTeñ to zamāna badal gayā
duniyā thī be-sabāt idhar kī udhar huī

kuchh duniyā bhī bezār hai ab ham jaise vahshat vāloñ se
kuchh apnā dil bhī duniyā kī is mahfil meñ ghabrā.e hai