Tags-Duniya

tumhārī bevafā.ī kyā sanad hai saarī duniyā ko
hue tum bevafā to umr merī bevafā kyuuñ ho

kise ḳhabar hai ki duniyā kā hashr kyā hogā
kabhī kabhī to mujhe aadmī se Dar sā lage

kaun degā dilāsa duniyā meñ
ab rahūñgā maiñ pyāsā duniyā meñ

jab se duniyā se tum ga.e abbā
mere sukh chain kho ga.e abbā

kaam farzāna-e-duniyā kā nahīñ ai nāseh
parcham-e-ishq zamāne meñ uThā.e rakhnā

mere dil ko to kisī haal meñ manzūr nahīñ
fikr-e-duniyā meñ tirī yaad bhulā.e rakhnā

vaqt baptisma kare āb-e-sitāra se use
dast-e-duniyā kī darāzī se nikaltī huī shaam

adā-e-husn-e-dil-kash ko zarā samjhe to ye duniyā
tavajjoh is meñ pinhāñ hai ye un kī be-ruḳhī kyoñ ho

chaar din kī ishrat par dil lagā na duniyā se
kahte haiñ ki jannat meñ aish-e-jāvedānī hai

duniyā kī āb-o-tāb se aage chale ga.e
ham ishq ke azaab se aage chale ga.e

zehn-e-ādam meñ hai afkār kī duniyā ābād
qalb-e-insāñ meñ amānat haiñ abhī ġham kitne

merī ye baat tū maane yā na maane lekin
bin tire duniyā meñ jiinā bhī adākārī hai

duniyā meñ itne shor-sharābe ke bāvajūd
jo bolte nahīñ haiñ vahī ahl-e-rā.e haiñ

duniyā kā na uqbā kā koī ġham nahīñ sahte
jo aap ke ho jaate haiñ apne nahīñ rahte

ab koī na.ī chaal chal ai gardish-e-duniyā
ham roz ke fitne ko qayāmat nahīñ kahte

ulfat ko miTāne ke dar pe duniyā aur maiñ is soch meñ huuñ
ulfat na rahegī jab baaqī ḳhvāb-e-dil-e-insāñ kyā hogā

raat kī raat bahut dekh lī duniyā terī
sub.h hone ko hai ab 'tarz' ko so jaane de

tum hamāre kisī tarah na hue
varna duniyā meñ kyā nahīñ hotā

badal jaa.e gar be-qarāroñ kī duniyā
to maiñ apnī duniyā luTā duuñ ḳhushī se

samajhte haiñ ham khel duniyā ke ġham ko
hamārī ḳhushī hai tumhārī ḳhushī se