Tags-Duniya

hai ye duniyā bahut vasī.a to ho
maiñ huuñ aur terā halqa-e-āġhosh

maiñ tire shahr se guzrā huuñ bagūle kī tarah
apnī duniyā meñ magan apne ḳhayālāt meñ gum

kī vafā kis se bhalā fāhisha-e-duniyā ne
hai tujhe shauq jo is qahba kī dāmādī kā

dil meñ jab bhī kabhī duniyā se malāl aatā hai
kitne hī zohra-jabīnoñ kā ḳhayāl aatā hai

jalte haiñ jahāñ vaale lo jaleñ ham rāh-e-vafā meñ saath chaleñ
duniyā ko chhoḌo duniyā to dil vāloñ kī dushman hotī hai

kyā shām-o-sahar us kī hai kyā us ke shab-o-roz
duniyā ko bhī jo kākul-o-ruḳhsār hī samjhe

sāñsoñ ke ta.āqub meñ hairān milī duniyā
tasvīr bane jab ham ā.īna huī duniyā

ham ḳhuun pasīna jab ik kar ke hue raushan
kyuuñ aag banī duniyā aur ḳhuub jalī duniyā

apnā nazariyya kyā mahrūm-e-nazar haiñ jab
us samt chale ham bhī jis samt chalī duniyā

sailāb-e-balā se ye kyuuñ ḳhauf dilātī hai
kyā ham ko bachā.egī sho.aloñ meñ ghirī duniyā

ma.amūl judā.ī hai go phuul kī gulshan se
lekin jo huī anqā ḳhvāboñ meñ basī duniyā

sab ḳhvāb purāne haiñ har chand fasāne haiñ
ham roz basāte haiñ āñkhoñ meñ na.ī duniyā

ham donoñ safar meñ the ma.alūm nahīñ ab kuchh
kyā tū ne kahī duniyā kyā ham ne sunī duniyā

fardā-e-qayāmat kā va.ada tirā pursāñ hai
ab kitnī bachīñ sāñseñ ab kitnī bachī duniyā

har baat pe hairānī har lamhe kī nigrānī
duniyā se 'atā' ya.anī kab samjhī ga.ī duniyā

phir is ke ba.ad hai ḳhud par yaqīñ na duniyā par
thī aisī baat hī ik pal ke e'tibār meñ kuchh

paa.ī ġhunchoñ meñ tire rañg kī duniyā ham ne
tere kāñToñ se liyā daras-e-tamannā ham ne

sun ke shikva hashr meñ kahte ho sharmāte nahīñ
tum sitam karte phiro duniyā pe sharmāne ko ham

usī duniyā ke kuchh naqsh-o-nigār ash.ār haiñ mere
jo paidā ho rahī hai haqq-o-bātil ke tasādum se

vaj.h duniyā bhī hai fitrat bhī hai
koī ḳhush koī hazīñ rahtā hai