Tags-Duniya

ham ki apnī raah kā patthar samajhte haiñ use
ham se jaane kis liye duniyā na Thukrā.ī ga.ī

ho na jaa.e tah-o-bālā kahīñ duniyā saarī
ek tūfān-e-balā-ḳhez bapā hai mujh meñ

ye 'muqaddas' haqīqī duniyā hai
aap rahtī haiñ kin ḳhayāloñ meñ

'ashk' is kārobārī duniyā meñ
aadmī ik fuzūl huuñ maiñ to

jab se mere baaġh meñ añgūr ke daane lage
mujh ko duniyā meñ hī jannat ke maze aane lage

bhuul shāyad bahut baḌī kar lī
dil ne duniyā se dostī kar lī

kyuuñ tark-e-alā.iq ko tum ne samjhā hai ilāj-e-ġham āḳhir
dekho to valī suufī bhī yahāñ kis ThaaT ke duniyā-dār hue

bashar kyā farishte jo pīTeñ DhiñDhorā to kyuuñ kar chhupe raaz kam-baḳht dil kā
idhar aah niklī hamārī zabāñ se udhar mach gayā saarī duniyā meñ hullaḌ

mālūm nahīñ kis vaqt ye kyā bartāv kisī se kartī hai
duniyā se koī ummīd na rakh māyūs na ho duniyā hī to hai

na samajh sakī jo duniyā ye zabān-e-be-zabānī
tirā chehra ḳhud kahegā mire qatl kī kahānī

ye vo dil-rubā hai duniyā mire dosto ki jis kī
na koī adā na.ī hai na koī adā purānī

fikr kī duniyā meñ columbus banā phirtā huuñ maiñ
ilm kī pahnā.ī kā kitnā baḌā faizān hai

jaane vaale kab rukte haiñ ruk bhī jaa.eñ to kab tak
jo jo duniyā meñ aatā hai us ko jaanā paḌtā hai

do-dhārī talvār hai duniyā tez haiñ us ke donoñ ruḳh
ashk chhupā kar ronā mushkil lekin ronā paḌtā hai

ohda-e-ishq se barḳhāst ham is duniyā meñ
ḳhaak kī ḳhuld-makānī ke liye aa.e haiñ

maz.hab kī kitāboñ meñ bhī irshād huā maiñ
duniyā tirī ta.amīr meñ buniyād huā meñ

mazmūn se likhtā huuñ ka.ī dūsre mazmūñ
duniyā ye samajhtī hai ki naqqād huā maiñ

ho ga.ī ġharqāb duniyā bhar gayā saarā jahāñ
ab to kahiye 'nūh' kā tūfān kyā hai kuchh nahīñ

tamām umr rahā sābiqa yazīdoñ se
mire liye to ye duniyā hai karbalā kī tarah

ye tum jo mujh se zarā sī bātoñ pe rūThte ho
maiñ saarī duniyā se ruuTh jā.ūñgā dekh lenā