Tags-Duniya

kisī ne muuñd ke āñkhoñ ko phir se khol diyā
ye kis ne aap ko duniyā pe āshkārā kiyā

jaan jaanī hai jab abas hī 'hamesh'
phir to duniyā se fāsla rakhiye

agarche maiñ riñd-e-mohtaram huuñ magar ise shaiḳh se na pūchho
ki un ke aage to is zamāne meñ saarī duniyā jahannamī hai

tez-tez-raftāri-e- na badal de me.aar
shaam ke saath kahīñ umr na Dhalne lag jaa.e

pahle bante the makāñ basne basāne ke liye
ab makāñ bante haiñ duniyā ko dikhāne ke liye

ye hamīñ haiñ ki tirā dard chhupā kar dil meñ
kaam duniyā ke ba-dastūr kiye jaate haiñ

duniyā se tan ko Dhāñp qayāmat se jaan ko
do chādareñ bahut haiñ tirī ān-bān ko

lafz kī duniyā alag shahr-e-ma.ānī aur hai
maiñ alag huuñ mujh se merī shā.erī bilkul alag

āḳhirash ḳhaak uḌā kar sar-e-rāhe dil kī
ek duniyā ko maiñ dil-gīr kiye jaatā huuñ

agar ye duniyā ujaḌ ga.ī to
kabhī ye sochā hai kyā karegā

huā hai sarshār vahm-e-'sāqī' tujhe nahīñ shauq-e-vasl baaqī
havā-e-duniyā kā hai mirāqī paḌā hai āvāgavan ke andar

jagmagāte hue mahloñ kī taraf to dekho
un kī duniyā meñ din aatā hai ki raat aatī hai

ham ne duniyā se sulūk aisā kiyā hai 'rānā'
ham na hoñge to bahut yaad karegī duniyā

badal jā.egā meyār-e-sharāfat chashm-e-duniyā meñ
ziyāda the jo apne zo.am meñ vo sab se kam hoñge

hā-o-hū kī duniyā meñ mā-o-tū kī duniyā meñ
rañg o bū kī duniyā meñ sādgī kahāñ jaa.e

be-ta.alluqī maslak ho chukā hai duniyā kā
dostī kahāñ jaa.e dushmanī kahāñ jaa.e

mun.im ke shukr meñ bhī hilā.eñ kabhī kabhī
tanhā barā.e-lazzat-e-duniyā zabāñ nahīñ

ik sarāpā savāl hai duniyā
ik mukammal javāb haiñ ham log

sitam-e-be-panāh hai duniyā
karam-e-be-hisāb haiñ ham log

baḌe tājiroñ kī satā.ī huī
ye duniyā dulhan hai jalā.ī huī