Tags-Duniya

duniyā meñ sadā chaltī hai chāhat kī hukūmat
aa jaao manā leñge ham itvār kisī din

ulfat ko miTāne ke dar pe duniyā aur maiñ is soch meñ huuñ
ulfat na rahegī jab baaqī ḳhvāb-e-dil-e-insāñ kyā hogā

kūza-e-duniyā hai apne chaak se bichhḌā huā
aur us ke biich maiñ aflāk se bichhḌā huā

is aarzī duniyā meñ har baat adhūrī hai
har jiit hai lā-hāsil har maat adhūrī hai

in jalvoñ se ma.amūr hai duniyā mire dil kī
ā.īnoñ kī bastī meñ jo nādīda rahe haiñ

tirī duniyā se shāyad bhar chukā hai merā dil 'sāhil'
yahāñ kā āb-o-dāna ab mujhe achchhā nahīñ lagtā

duniyā meñ jo thā taabe thā jahāñ ma.alūm nahīñ pahuñchā vo kahāñ
ibrat kā mahal kahte haiñ ise ab gor meñ bhī bahrām nahīñ

dīdār ke bhūke tere jo haiñ hai ḳhatm unhīñ par nafs-kushī
kuchh ḳhvāhish-o-fikr-e-faut nahīñ duniyā ke maze se kaam nahīñ

nizām-e-bazm-e-duniyā hashr ke maidāñ kā naqsha hai
yahī hai shāmat-e-isyāñ bhaTaknā dar-ba-dar merā

tabsira yuuñ na mire haal pe itnā hotā
us ko nazdīk se duniyā ne jo dekhā hotā

kitnī qātil hai ye duniyā lekin
kitnī ma.asūm banī rahtī hai

jis ne chhupā ke bhuuk ko patthar meñ rakh liyā
duniyā ko is faqīr ne Thokar meñ rakh liyā

yahī hai muḳhtasar sī apnī duniyā
ye merā aa.ina hai aur maiñ huuñ

nahīñ ye fikr koī rahbar-e-kāmil nahīñ miltā
koī duniyā meñ mānūs-e-mizāj-e-dil nahīñ miltā

ai mire nāseh-e-mushfiq kabhī ye bhī sochā
kaun duniyā meñ ḳhushī se tah-e-dām aatā hai

ye bahas o takrār chhoḌ de aa ye zohd kā ahd toḌ de
rahegī ai mudda.ī-e-hurmat sharāb-e-duniyā harām kab tak

na jaane ho gayā duniyā meñ tere jaisā kyuuñ
sabaq hayāt kā tū ne mujhe paḌhāyā kab

bin māñge mil jaa.e motī to is ko taqdīr kaho
dāman phailā kar duniyā mil jaa.e to ḳhairāt huī

sankaT ke din the to saa.e bhī mujh se katrāte the
sukh ke din aa.e to dekho duniyā mere saat huī

jī ke bahlāne ko duniyā meñ sahāre haiñ bahut
sāzgār aa.e tumheñ ham se judā ho jaanā