Tags-Dushman

dushman kī jeb meñ tum sabr-o-shakeb meñ ham
tum dast-e-kotahī ho pā-e-nigār haiñ ham

kab tak rahegā dushman jaame se apne bāhar
ho aag aag jis se tum vo sharār haiñ ham

allāh re zarf-e-dil kā sab kī jagah hai is meñ
be-ġham rahe hai dushman kyā ġham-gusār haiñ ham

vaañ sarguzisht-e-dushman vo kah rahe haiñ muñh par
yaañ be-ḳhudī hai is par kyā rāz-dār haiñ ham

kyā jaane kyā dikhā.e kam-baḳht rāz-e-dushman
be-iḳhtiyār ho tum aur be-qarār haiñ ham

tire barasne se paanī hai qalb dushman kā
amal ye nek hai 'tamjīd' baar baar baras

tum se milte hī bichhaḌne ke vasīle ho ga.e
dil mile to jaan ke dushman qabīle ho ga.e

dostoñ kā kyā hai vo to yuuñ bhī mil jaate haiñ muft
roz ik sach bol kar dushman kamāne chāhiyeñ

apnoñ kī hamdardī se
dushman bhī ḳhush rahte haiñ

kahūñ kyā hai kyā mirī zindagī ye hai zindagī koī zindagī
vo hai dushman-e-dil-o-jāñ mirā dil-o-jāñ se jis pe nisār huuñ

raazī haiñ ham ki dost se ho dushmanī magar
dushman ko ham se dost banāyā na jā.egā

kyuuñ dostoñ kī bhiiḌ se ghabrā na jaa.e dil
dushman to rah ga.e haiñ yahāñ kam bahut hī kam

vahī dushman bane baiThe haiñ 'maikash'
jo dam bharte the apnī dostī kā

ahl-e-dil aql ke dushman Thahre
ham ko ai dost nasīhat kaisī

muskān hameñ denī hai dushman ke laboñ par
āñkhoñ se kisī kī na yahāñ ashk baheñge

ik ḳhalish ik karb pinhāñ merī ḳhākistar meñ hai
merā dushman hādisa ye hai ki mere ghar meñ hai

ab jafā se bhī haiñ mahrūm ham allāh allāh
is qadar dushman-e-arbāb-e-vafā ho jaanā

vaqt-e-mushkil ġhair kyā apne bhī dushman ban ga.e
kah gayā hai josh meñ dīvāna gahrā.ī kī baat

shāḳh hī shāḳh kī dushman thī samar kyā detā
phūlne-phalne se pahle hī shajar ḳhatm huā

ai dost koī mujh sā rusvā na huā hogā
dushman ke bhī dushman par aisā na huā hogā