Tags-Dushman

rakheñ apne ta.iiñ ham kis tarah dost
ho tujh sā shaḳhs jab dushman hamārā

adū thī barq na dushman thā bāġhbāñ apnā
jalāyā kis ne mirā āshiyāñ nahīñ ma.alūm

dushman-e-jāñ koī banā hī nahīñ
itne ham lā.iq-e-jafā hī nahīñ

kisī dushman kā koī tiir na pahuñchā mujh tak
dekhnā ab ke mirā dost kamāñ kheñchtā hai

rashk se merā chehra taktī hai duniyā
jaan kī dushman us kī surḳhī-e-lab hotī hai

ishq kiyā to apnī hī nādānī thī
varna duniyā jaan kī dushman kab hotī hai

aanā bhī aane vaale kā afsāna ho gayā
dushman ke kahne sunñe se kyā kyā na ho gayā

magar kitne sūraj haiñ dushman mire
mirī haisiyat ek zarra sahī

hausla fat.h kā zāmin huā kartā hai magar
mere dushman haiñ ki qaa.il mirī shamshīr ke haiñ

āfrīñ āfrīñ dushman-e-jāñ mire
terī ījād hai ye sitam bhī nayā

tujh se jaltā hai jo vo aur jalāte haiñ use
mire haq meñ mire dushman kī adāvat achchhī

ruḳh ḳhāl-o-zulf-o-ḳhat lab dandāñ zaqan zanaḳhdāñ
us ke haiñ apne dushman 'inshā' har aan āThoñ

dil-e-nālāñ ne ham-sāyoñ ko bhī dushman kiyā apnā
rahā karte haiñ ham battīs dāñtoñ meñ zabāñ ho kar

maiñ nīyat-e-shab-ḳhūñ se ḳheme meñ gayā lekin
dushman ke sirhāne se shamshīr uThā laayā

vahī hijr dushman-e-vasl hai vahī marg-o-zīst meñ fasl hai
vahī apne shaġhl se shaġhl hai vahī apne kaam se kaam hai

aap kā muñh hai varna ham sunte
dushman-e-bad-shi.ār kī bāteñ

jab dost bhī dushman kā taraf-dār huā thā
Thankā thā usī din sar-e-mahfil mirā māthā

nit-na.e ḳhvāb dikhātā hai ujāloñ ke liye
vo ki hai dushman-e-jāñ dushman-e-īmāñ apnā

vo dushman-e-sukūn-e-dil-o-jāñ yahī na ho
ma.asūm sī nigāh ki jis par gumāñ nahīñ

ek isī ummīd pe haiñ sab dushman dost qubūl
kyā jaane is sāda-ravī meñ kaun kahāñ mil jaa.e