Tags-Dushman

dil meñ laate nahīñ dushman se bhī nafrat kā ḳhayāl
is se kam koī ibādat nahīñ ham kar sakte

munāfiqat kā nayā hai ye dil-fareb andāz
mujhe milā mirā dushman bhī āshnā kī tarah

zamāna dushman-e-jāñ ho gayā ye ġham hai magar
mirā nasīb ki ḳhanjar ba-dast-e-yār mile

baiThā thā maiñ hisār-e-falak meñ zamīn par
dushman ne fat.h khīñch lī merī shikast se

ba-juz zāt-e-ḳhudā 'ehsān' koī bhī nahīñ apnā
sunā thā laakh dushman hoñ to ik hamdam bhī hotā hai

jo ek ho to ham us ko ro.eñ hue haiñ dushman badan ke ro.eñ
hameñ to har tār-e-āstīñ par gumān hai mār-e-āstīñ kā

jaan kar 'beḳhud' huā ḳhud dushman apnī jaan kā
phir gilā kyuuñ dostoñ se hai mirā koī nahīñ

dushman kī dostī ne masāfat sameT lī
qadmoñ meñ rāste the magar raat ho ga.ī

kam na thī teġh se adā-e-ḳhirām
dost dushman kī shaan se niklā

mirī anā mire dushman ko tāziyāna hai
isī charāġh se raushan ġharīb-ḳhāna hai

ye vo duniyā hai ki jis kā kuchh Thikānā hī nahīñ
ham guzāra kar rahe haiñ dushman-e-jānī ke saath

thī aag bhī terī hī tarah hosh kī dushman
varna mujhe jal marne kā armāñ to nahīñ thā

ġham-e-nāzuk ko tabassum ne kiyā parda-nashīñ
ashk dushman kī tarah raaz batāne nikle

na jaane kaun sā jazba thā jis ne ḳhud hī 'nazīr'
mirī hī zaat kā dushman banā diyā mujh ko

aksar ḳhushī hī ban ga.ī hai dushman-e-sukūñ
ġham ban gayā sukūt kā sāmāñ kabhī kabhī

vo aur vafā-dushman māneñge na maanā hai
sab dil kī sharārat hai āñkhoñ kā bahānā hai

ik dushman-e-vafā se baḌhā.ī hai rasm-o-rāh
ḳhud apnī ārzūoñ kā ḳhuuñ kar rahā huuñ maiñ

ātish-bayānī-e-lab-e-'kaifī' ne bazm meñ
dushman ke dil ko ḳhaak kiyā phūñk phūñk kar

ham-nashīñ dost kī sūrat to kahāñ miltī hai
chain se vo hai jo dushman ko na jaane apne

jo dost thā vahī dushman hai kyā kiyā jaa.e
ajab ḳhalish ajab uljhan hai kyā kiyā jaa.e