Tags-Dushman

jā chuke haiñ aap kal dushman ke ghar
aaj marg-e-nā-gahānī jā.egī

iz.hār-e-ishq us se na karnā thā 'sheftā'
ye kyā kiyā ki dost ko dushman banā diyā

shādāb ho rahā thā ismat kā jin se gulshan
qaa.il haiñ jin kī ismat ke dost aur dushman

tadbīr tark-e-dushman-e-jāñ kī hai raat din
kis tarah phir mujhe gila-e-dostāñ na ho

maiñ to dil se us kī dānā.ī kā qaa.el ho gayā
dostoñ kī saf meñ hai aur dushman-e-jānī bhī hai

sābit qadam haiñ aaj bhī ham apne qaul par
dushman ko ham se dost banāyā na jā.egā

galī meñ log bhī the mere us ke dushman log
vo sab pe hañstā huā mere dil meñ aayā thā

tamām log hī dushman dikhā.ī dete haiñ
koī batā.e ki āḳhir ye kyā huā mujh ko

ye na.ī hai gardish-e-charḳh-e-kuhan
dushman-e-jāñ hai jafā-e-dil-shikan

kyoñ banī hai jaan kī dushman mirī mujh ko batā
tere pīchhe maiñ bhalā bhāgā huuñ kab ai zindagī

ek hī peḌ par saañp aur aadmī saath rahte haiñ sailāb utarne talak
ham-safar hai agar dushman-e-jāñ to kyā raah sunsān hai baat karte raheñ

vafā-dushman ye aalam ab to hai terī navāzish se
ki rahm aane lagā merī zabūñ-hālī pe dushman ko

aap hī apnā maiñ dushman ho gayā
tap gayā sonā to kundan ho gayā

chale laakh chaal duniyā ho zamāna laakh dushman
jo tirī panāh meñ ho use kyā kisī se Darnā

kaam us kā hai satānā vo satā.egā hī
dushman-e-jāñ kī ḳhurāfāt pe ġham kyā karnā

jaise dushman hī nahīñ koī mirā apne sivā
lauT aatā hai mirī samt hī patthar merā

jis ko man kā miit banāyā āḳhir dushman Thahrā
kis kis ko ham miit banā.eñ kis kis se ham uljheñ

ab sūraj kī saarī duniyā dushman hai
ab chehre mahtāb nahīñ hote bhaa.ī

ummīd nā-umīd ko un se nahīñ rahī
dushman ke dost haiñ vo hue mere yaar kab

dost jab se hue hamāre tum
koī dushman burā nahīñ lagtā