Tags-Dushmani

vafā par daġhā sulh meñ dushmanī hai
bhalā.ī kā hargiz zamāna nahīñ hai

aap āñkhoñ meñ bas ga.e jab se
niiñd se dushmanī huī tab se

dushmanoñ hī se dushmanī bhī milī
aur dar-parda rahbarī bhī milī

mujh ko jin se ishq hai un ko hai mujh se dushmanī
yaañ vo aate the ki uljhe paañv gesū-e-dost

ho dushmanī bhī kisī se to dā.imī kyuuñ ho
jo TuuT jaa.e zarā meñ vo dostāna kyā

jo kare yaad dushmanī meñ bhī
aise dushman ko pyaar kartā huuñ

dil kā burā nahīñ magar shaḳhs ajiib Dhab kā hai
mujh se hai ḳhaas dushmanī vaise to yaar sab kā hai

dushmanī achchhī nikālī vaqt ne
bojh in kāñdhoñ pe kaisā rakh diyā

ab ke jab gaañv se lauTe to ye ehsās huā
dushmanī ḳhuun kā rishta bhī nahīñ chhoḌtī hai

ajiib dastūr-e-āshiqī hai na maiñ hī maiñ huuñ na tum hī tum ho
na dostī dostī kī sūrat na dushmanī dushmanī kī sūrat

na dostī kā use mile phal na koī marbūt hove us se
ki jis ne kar dushmanī ḳhudāyā jo rabt aapas meñ thā chhuḌāyā

usī ke dam pe manāyā thā us ne jashn mirā
ki dushmanī meñ bhī jo dostī bachī huī thī

karnī nahīñ hai duniyā meñ ik dushmanī mujhe
kahte haiñ saare log kabhī aadmī mujhe

nashsha-e-mai meñ khulī dushmanī-e-dost mujhe
āb-e-añgūr ne kī ātish-e-pinhāñ paidā

vaqt rūThā rahā bachche kī tarah raah meñ koī khilaunā na milā
dostī kī to nibhā.ī na ga.ī dushmanī meñ bhī adāvat na huī

baaġh ne kis se dushmanī kar lī
kaun har phuul ko masaltā hai

aise bigḌe ki phir jafā bhī na kī
dushmanī kā bhī haq adā na huā

shikva-e-dushmani kareñ kis se
vaañ shikāyat hai dost-dārī kī

mirī nazar meñ hai anjām is ta.āqub kā
jahāñ bhī dostī jaatī hai dushmanī jaa.e

gardish-e-roz-o-shab ne na jaane kahāñ kī nikālī hai 'mullā' se ye dushmanī
us ne sāġhar uThāyā sahar ho ga.ī us ne sāġhar rakhā māhtāb aa gayā