Tags-Dushmani

kuchh marāsim 'salām' rahne de
dushmanī jāvedāñ nahīñ hotī

aap se dostī kā ik mafhūm
saarī duniyā se dushmanī bhī hai

tum sitam meñ kamī na farmāo
ham ise dushmanī samajhte haiñ

vo nādān anjān bhole haiñ aise
ki sab sheva-e-dushmanī jānte haiñ

payām-e-āshtī ik Dhoñg dostī kā thā
milā vo hañs ke taqāzā ye dushmanī kā thā

āsmāñ kī dushmanī itnī bhī yak-tarfā nahīñ
ham bhī dhartī kī balāoñ ko ḳhalā tak le ga.e

kuchh tirī dostī kī qadr nahīñ
dushmanī ḳhās-o-ām rakhte haiñ

dushmanī meñ jhuk ga.ī us kī kamar
āsmān ne kyā hamārā kar liyā

vo merī jaan kā dushman hai jāntā thā maiñ
milā jo hañs ke to meñ dushmanī ko bhuul gayā

rahtā hai mere darpai-e-āzār phir bhī vo
us se agarche merī koī dushmanī nahīñ

azal se rindoñ ko mai kī aadat hai aur vaa.iz kī sarzanish kī
taḳhāluf-e-vaz.a se hai jhagḌā na dostī hai na dushmanī hai

mujhī meñ Duub gayā dushmanī nibhāte hue
ḳhudā bhī haar gayā mujh ko āzmāte hue

kyā banegā is jahāñ meñ ashraf-ul-maḳhlūq kā
har taraf jab dushmanī hī dushmanī rah jā.egī

hamāre ishq ke charche zamāne bhar meñ hote the
ye kis ne dushmanī āḳhir hamāre darmiyāñ rakh dī

ai mukartī aañkh adāvateñ tū qayām bhī haiñ sabāt bhī
tire saath dushmanī ik taraf nahīñ dostī kī majāl bhī

dushmanī jaanī hai ab to ham se ġhairoñ ke liye
ik samāñ sā ho gayā vo bhī ki ham yāroñ meñ the

vo dushmanī kareñ to kareñ iḳhtiyār hai
ham to adū ke dost haiñ dushman ke yaar haiñ

dushmanī hai use arbāb-e-vafā se lekin
ye na hoñge to inheñ yaad karegī duniyā

pūchhā hai ġhair se mire hāl-e-tabāh ko
iz.hār-e-dostī bhī kiyā dushmanī ke saath

kyā ruup dostī kā kyā rañg dushmanī kā
koī nahīñ jahāñ meñ koī nahīñ kisī kā