Tags-Dushmani

hai hai ḳhudā-na-ḳhvāsta vo aur dushmanī
ai shauq-e-munfa.il ye tujhe kyā ḳhayāl hai

ik talavvun hai do mizājoñ kā
dostī kyā hai dushmanī kyā hai

kyā kahiye dushmanī rahī yā dostī rahī
bigḌī to bigḌī aur banī to banī rahī

jab un se dostī na rahī dushmanī rahī
bigḌī to bigḌī aur banī to banī rahī

phir us ko dost jaan rahā huuñ hazār haif
mujh se tamām-umr jise dushmanī rahī

kis liye 'vajd' dil-girafta ho
dushmanī dostoñ kī aadat hai

un ke andāz dushmanī meñ bhī
dostī kī ajab shabāhat hai

kyā lutf-e-dostī ki nahīñ lutf-e-dushmanī
dushman ko bhī jo dekhiye puurā kahāñ hai ab

miTtī nahīñ dushmanī kisī kī
rañg us meñ hai merī dostī kā

na dushmanī kī alāmat na dostī kā shu.ūr
tire paḌos meñ 'shātir' makān kis kā hai

dushmanī kā safar ik qadam do qadam
tum bhī thak jāoge ham bhī thak jā.eñge

tohmateñ hazrat-e-insāñ pe na dhariye 'anvar'
dushmanī hai ki chalī aatī hai talvāroñ meñ

abhī kuchh aur jakaḌ dushmanī kī bandish meñ
lahū kā zā.iqa zanjīr meñ nahīñ aayā

ye chhuā chhūt hai dushmanī kā sabab ham-vatan haiñ to phir hai ye tafrīq kyuuñ
ik barahman hai aur ek janjāt hai vo bhī insān hai vo bhī insān hai

dard-e-dil meñ kamī na ho jaa.e
dostī dushmanī na ho jaa.e

maiñ dost se na kisī dushmanī se Dartā huuñ
bas is zabān kī be-pardagī se dabtā huuñ

dostī vaj.h-e-adāvat hī sahī
dushmanī bahr-e-rifāqat hī sahī

dostī ke naam par kiije na kyūñkar dushmanī
kuchh na kuchh āḳhir tarīq-e-kār honā chāhiye

maiñ kabhī dushmanī nahīñ kartā
aur ho jaa.e to nibhātā huuñ