Tags-Earthquake

maanā ki zalzala thā yahāñ kam bahut hī kam
bastī meñ bach ga.e the makāñ kam bahut hī kam

tūfān zalzala kabhī sailāb aa gayā
pur-amn to ḳhudā bhī hukūmat na kar sake

be-yār sar paTakne se hiltā hai ghar mirā
rahtā hai zalzala dar-o-dīvār ke liye

ek āvāz aa.ī ki aurat huuñ maiñ
barq huuñ zalzala huuñ qayāmat huuñ maiñ

maiñ us ke saath huuñ jo uTh ke phir khaḌā ho jaa.e
maiñ tere shahar ko ab zalzala nahīñ dūñgā

zalzala aayā vo dil meñ vaqt kī raftār se
ḳhud-baḳhud tasvīr terī gir paḌī dīvār se

us taraf tūfān aayā aur din lambā huā
ham par aayā zalzala aur raat gahrī ho ga.ī

zalzala gor meñ majnūñ kī paḌā rahtā hai
apnā ye shor hai ab bādiya-paimā.ī kā

zabāñ hile na hile dil hile to kaam chale
ye zalzala ho to aa jaa.e guftugū merī

rahegī chaar dīvār-e-anāsir darmiyāñ kab tak
uThegā zalzala ik din isī baiThe hue dil se

maiñ jalā to sho.ale meñ josh thā jo huā maiñ ḳhaak hai zalzala
maiñ hazār shakl badal chukā pa kisī tarah na chhupā qalaq

ye sab sahī ki zalzala hai tā-falak magar
shoḳhī to apnī dekh mirā iztirāb kyā

ta.allī zamīñ se jo nāloñ ne kī
falak par ayaañ zalzala ho gayā

pāmāl shoḳhiyoñ meñ karo tum zamīn ko
Dālūñ falak pe zalzale meñ iztirāb meñ

tāmīr-e-nau qazā-o-qadar kī nazar meñ hai
aaj ek zalzala sā har ik bām-o-dar meñ hai

phir aa na jaa.e lauT ke ye zalzala abhī
jo aa ke tham gayā thā vo sailāb aur hai

kuchh aaj zalzala sā zamīñ ko hai gor meñ
'taskīn'-e-be-qarār magar ārmīda hai

zalzale meñ jo zamīñ aatī hai
ye bhī us shoḳh pe bismil to nahīñ

zabt gar had se baḌhā to zalzala bhī aa.egā
tere mere darmiyāñ phir fāsla bhī aa.egā

ḳhud-parastī ke mahallāt meñ rahne vaalo
zalzala aane ko hai larzish-e-pā jāntī hai