Tags-Aankh

na jhepo sub.h-e-visāl dekho tum aañkh se aañkh to milāo
liye haiñ gin gin ke maiñ ne bose zabān par hai hisāb-e-āriz

niind aatī hai magar jaag rahā huuñ sar-e-ḳhvāb
aañkh lagtī hai to ye umr guzar jaanī hai

us ke laḌne ke bhī sadqe ki nazar aatā hai
ain ranjish meñ ajab aañkh laḌāne kā mazā

kis maze se hai ayaañ duzdī-e-dil hai zālim
luuñ charā kyūñki tire aañkh churāne kā mazā

dekhiyo us kī zarā aañkh dikhāne kā mazā
chitvanoñ meñ hai bharā saare zamāne kā mazā

dil meñ mire jigar meñ mire aañkh meñ mirī
har jā hai dost aur nahīñ miltī hai jā-e-dost

tum ko sote meñ bhī kab aañkh uThā kar dekhā
ham ne ḳhvāboñ meñ bhī ā.ankhoñ kī nigah-dārī kī

jin dinoñ ġham ziyāda hotā hai
aañkh meñ nam ziyāda hotā hai

dekhne vaale hasīñ aañkh bahut dekhte haiñ
jo pas-e-chashm hai ġham us ko bhī dekhā jaa.e

aql kī aañkh se dekhā hai tumhāre chhal ko
tīsrī aañkh banātā hai banāne vaalā

agarche aañkh bahut shoḳhiyoñ kī zad meñ rahī
mirī nigāh hamesha adab kī had meñ rahī

vo ḳhvāb ban ke aañkh se phūTā to hai magar
ik ashk ban gayā hai sharāra nahīñ huā

ik lafz jis ke ijz meñ iz.hār-e-dam-ba-ḳhud
ik naam merī aañkh kā taara nahīñ huā

e'tirāf-e-ishq ne namnāk kī āñkheñ mirī
aañkh meñ kājal qasam hai is tarah phailā na thā

kab talak aañkh na kholegā zamāne kā zamīr
zulm aur jabr kī ye riit chalegī kab tak

kah diyā thā ki ye rahbar jo chunā hai tum ne
saaf tote kī tarah aañkh badal jā.egā

kabhī yuuñ bhī aa mirī aañkh meñ ki mirī nazar ko ḳhabar na ho
mujhe ek raat navāz de magar is ke ba.ad sahar na ho

ye ġhazal ki jaise hiran kī aañkh meñ pichhlī raat kī chāñdnī
na bujhe ḳharābe kī raushnī kabhī be-charāġh ye ghar na ho

kabhī jo aañkh pe gesū-e-yār hotā hai
sharāb-ḳhāne pe abr-e-bahār hotā hai

do-chār sitāre hī mirī aañkh meñ dhar jā
kuchh der to ai sā.at-e-shab mujh meñ Thahar jā