Tags-Aankh

baras rahī thī haqīqat kī dhuup ghar bāhar
sahm ke aañkh ke āñchal meñ kho ga.e sapne

dil ye har-gām pe kahtā hai Thahar ghar hai yahī
farq se tā-ba-qadam aañkh jahāñ tak pahuñche

baat vo baat nahīñ hai jo zabāñ tak pahuñche
aañkh vo aañkh hai jo sirr-e-nihāñ tak pahuñche

ye kaisā shahr hai maiñ kis ajā.ib-ghar meñ rahtā huuñ
maiñ kis kī aañkh kā paanī huuñ kis patthar meñ rahtā huuñ

aañkh khulī to sannāTe kī kokh meñ the be-sudh
koī ajab āvāz thī jis par uḌte aa.e ham

jab se us kī aañkh meñ aañsū dekhe haiñ
tab se mujh ko paanī se Dar lagtā hai

us ne to in motiyoñ par ḳhaak bhī Daalī nahīñ
aañkh kī thālī meñ dil aañsū sajā kar le gayā

abhī 'shāhid' luTāo ġham kī daulat
abhī haiñ aañkh meñ la.al-o-gohar kuchh

ye aañkh hai hama-dam gardish-e-tajassus meñ
talāsh kartī hai mujh meñ koī dafīna-e-ḳhvāb

dasht-e-ġham meñ kab mirā naqsh-e-qadam
har qadam pe aañkh dikhlātā nahīñ

apne shahr ke gūñge bahre logoñ ko maiñ apne
jab bhī dil kī baat sunā.ūñ aañkh meñ aañsū aa.e

jab bhī des ko vāpas jā.ūñ aañkh meñ aañsū aa.e
zehn meñ maazī ko lauTā.ūñ aañkh meñ aañsū aa.e

dard meñ Duubā kaise likkhūñ duniyā kā afsāna
'amjad' jab bhī qalam uThā.ūñ aañkh meñ aañsū aa.e

koī na mere aañsū poñchhe gale na koī lagā.e
kis se ab maiñ aas lagā.ūñ aañkh meñ aañsū aa.e

ye muskāneñ jhūTī ḳhushiyāñ kab tak bāñTūñ maiñ
kis ko dil ke zaḳhm dikhā.ūñ aañkh meñ aañsū aa.e

qadam qadam par dhoke-bāz haiñ pyaar jatāte haiñ
un ke raaz samajh na pā.ūñ aañkh meñ aañsū aa.e

tujh ko muzhda ho mirī aañkh ki ab
mujh meñ baaqī na rahī himmat-e-ḳhvāb

qarīb-e-sub.h ye kah kar ajal ne aañkh jhapkā dī
are o hijr ke maare tujhe ab tak na ḳhvāb aayā

pinhāñ thā ḳhush-nigāhoñ kī dīdār kā maraz
band aañkh jab huī to hamārā khulā maraz

agar ḳhayāl meñ ḳhvāboñ kī guuñj baaqī hai
to aañkh khulte hī ġhoġhā-e-hā-o-hū hī sahī