Tags-Aankh

laate hī kuchh rañg-e-javānī aañkh se yuuñ kiiñ aañkh ne bāteñ
aao dikhā.eñ sab ko ghāteñ sho.abda-gar tum jādūgar ham

kab tak ye taqdīr kā ronā aao kuchh tadbīr kareñ
aañkh meñ aañsū chāk-e-garebāñ darshāne se kyā hogā

TūTnā phir aañkh bharnā kar rahe haiñ ham musalsal
maut se pahle hī kitnī baar mar ke aa ga.e ham

vasl meñ bhī hijr ko mahsūs kar ke aa ga.e ham
dil lagāne ko ga.e the aañkh bhar ke aa ga.e ham

dil se jab lau lagī nahīñ hotī
aañkh bhī shabnamī nahīñ hotī

bādal chīḳh uThā hai bijlī TuuT paḌī hai tharrā kar
jab ham ne apnī barsī-barsā.ī aañkh uThā.ī hai

aañkh se ojhal ho kar dil ko apnī yaad dilā.ī hai
dil hī meñ aa baiThe ho ye aur qayāmat Dhaa.ī hai

phaT paḌeñ ab hī dar-o-bām to parda rah jaa.e
falak-e-ḳhāna-ḳharāb aañkh dikhātā hai mujhe

mirrīḳh kāñptā hai tumhāre jalāl se
tum se milā.e aañkh ye kis kī majāl hai

kyuuñ milā hai hameñ āḳhir ye kafan kā parda
maut kī aañkh meñ khaTkā tan-e-uryāñ apnā

jī uThe dekh ke ham kūcha-e-jānāñ kī bahār
aañkh ke sāmne thā chashma-e-haivāñ apnā

hotā hai shab-o-roz tamāshā sar-e-ehsās
jo dekhtī rahtī hai mirī aañkh dikhā bhī

baḌā ta.ajjub hai terī āñkhoñ kī ik tajallī se jal gayā huuñ
vagarna sho.aloñ kī aañkh par maiñ girā guzartā javāñ huā thā

hir phir ke un kī aañkh udū se laḌe na kyuuñ
fitna ko kartī hai nigah-e-fitna-zā pasand

haqīqat ḳhvāb meñ Dhalne ko thī maujūdgāñ meñ
samay kī aañkh ke ā.indagāñ meñ din nahīñ thā

gumāñ na kyūñki karūñ tujh pe dil churāne kā
jhukā ke aañkh sabab kyā hai muskurāne kā

ḳhvāb meñ toḌtā rahtā huuñ anā kī zanjīr
aañkh khultī hai to dīvār nikal aatī hai

mirī hai pyaas jo sahrā-ba-lab, sharar-ba-zabāñ
tumhārī aañkh hai gahre samundaroñ kī tarah

aañkh andhī thī zamāne se yahāñ logoñ kī
mar ga.ī zer-e-dahan quvvat-e-goyā.ī bhī

use band aañkh se maiñ dekh to luuñ
magar phir umr-bhar kā fāsla hai