Tags-Aankh

Duube hue tāroñ pe maiñ kyā ashk bahātā
chaḌhte hue sūraj se mirī aañkh laḌī thī

kal jis ābgīne se mauj-e-mai chhalaktī thī
aaj us ābgīne kī aañkh meñ namī sī hai

har fasurda aañkh se mānūs thī apnī nazar
dukh bhare sīnoñ se ham-rishta mirā siina bhī thā

raakh bin jal bujhe par ye dil se dhuāñ ab bhī uThtā hai kyuuñ
aañkh meñ dekhne kī sakat ho na ho aas martī nahīñ

tirī talvār kā muñh ham se phir jaa.e to phir jaa.e
hamārī aañkh kab qātil tah-e-shamshīr phirtī hai

milā kar aañkh phir āñkheñ churānā
adā-e-ḳhās hai ye dilbarī kī

aañkh khulī to saare manzar ġhā.eb haiñ
band āñkhoñ se kyā kyā dekhā kartā thā

hamārī aañkh se girte nahīñ ye ashk ke qatre
nichhāvar karte haiñ motī tumhāre rū-e-raushan par

nazar meñ jaise 'shīrīñ' ke tumhārā rū-e-raushan hai
nahīñ paḌtī hai aañkh us kī gul-e-shādāb-e-gulshan par

aañkh ke andhe ko phir bhī aql hai
aql ke andhe ko sab ulTā dikhe

jo reg-e-dil pe likhā hai us ko dukhoñ kā paanī miTā na Daale
maiñ ḳhvāb dekhe hī jā rahā huuñ ye aañkh barse hī jā rahī hai

aañkh se dil meñ samā jaate the dil se ruuh meñ
zindagī-e-shauq kā har haal betābāna thā

aañkh sahmī huī Dartī huī dekhī ga.ī hai
amn kī fāḳhta martī huī dekhī ga.ī hai

buuñd girī thī jalte mausam ke hoñToñ par
aañkh meñ aañsū dil meñ sho.ala vāpas aayā

raushnī thī aañkh thī manzar thā phir kuchh bhī na thā
haa.e kis āshob ko apnī nazar samjhā thā maiñ

zabt kartā huuñ vale is par bhī hai ye josh-e-ashk
gir paḌā jo aañkh se qatra vo dariyā ho gayā

chāñd khiḌkī meñ na aayā aaj phir
aañkh meñ ik jhiil thī vo bah ga.ī

idhar aañkh laḌtī hai aġhyār se
udhar karte jaanā ishārā mujhe

dhuup chhāñv kā koī khel hai bīnā.ī bhī
aañkh ko DhūñD ke laayā huuñ to manzar gum hai

jāgte jāgte chaḌhā sūraj
aañkh dukhne lagī ujāloñ meñ