Tags-Aankh

shaam tak bhī jab koī niklā na daana Dālne
aañkh bhar bhar kar muñDeroñ se parinde uḌ ga.e

zuhal kī aañkh paḌī ittifāq se nāgāh
tamām ho gayā tārāj mulk-o-māl aur jaah

barfīlī rut kī tez havā kyuuñ jhiil meñ kañkar pheñk ga.ī
ik aañkh kī niiñd harām huī ik chāñd kā aks ḳharāb huā

aañkh ashk bahāne pe hai māmūr minal-ishq
aur hoñT haiñ chup rahne pe majbūr minal-ishq

varna kyuuñ aañkh meñ aañsū huuñ ba-vaqt-e-dushnām
dushmano tum bhī mirī ziist ke ḳhvāhāñ ho zarūr

lahū zamīñ ke shagāfoñ se be-sabab phūTā
falak kī aañkh abhī mā.il-e-gazand na thī

tire visāl kī ummīd yuuñ bhī TuuTī hai
ki aañkh bhar bhī nahīñ paa.e aur chhalak jaa.e

kho chuke ro ro ke ghar bāhar kī saarī kā.enāt
ashk kaise aañkh meñ ab ḳhuun bhī dil meñ nahīñ

ġham jab un kā diyā huā ġham hai
haif us aañkh par jo pur-nam hai

aañkh ne dhoka khāyā thā yā saayā thā
vo khiḌkī meñ aayā thā yā saayā thā

is tarah bhes meñ āshiq ke chhupā hai ma.ashūq
jis tarah aañkh ke parde meñ nazar hotī hai

ki us kī aañkh bhīgī jā rahī thī
magar vo muskurānā chāhtā thā

ham se kuchh bhī ho na paa.ī ehtiyāt-e-dilbarī
apnī kotāhī pe aisī aañkh sharmā.ī ki bas

jhilmilātā hai mirī aañkh meñ aañsū ban kar
aa gayā raas mujhe dil meñ utārā huā ishq

shab na jaane aañkh par kyā raaz ifshā kar ga.ī
ḳhvāb chaknāchūr ho kar rah ga.e ta.abīr se

phir havā ke haath par bai.at ko dil betāb hai
aañkh phir raushan huī hai gard kī tahrīr se

maiñ samjhā thā ḳhvāb hai lekin
aañkh khulī to chauñk ke dekhā

zarā sī Thes lagne se chhalak paḌte haiñ kyuuñ aañsū
hamesha aañkh meñ itnī namī achchhī nahīñ lagtī

vo naġhma bulbul-e-rañgīñ-navā ik baar ho jaa.e
kalī kī aañkh khul jaa.e chaman bedār ho jaa.e

tumhārī aañkh par aayā savāl urdu ke parche meñ
batāo lājavrdī arġhavānī kis ko kahte haiñ