Tags-Aankh

chāhā thā ki un kī āñkhoñ se kuchh rañg-e-bahārāñ le liije
taqrīb to achchhī thī lekin do aañkh milānā bhuul ga.e

kal tak to us meñ aisī karāmat na thī koī
vo aañkh aaj qibla-e-hājāt ho ga.ī

kahā ye maiñ ne ki apnī āñkhoñ meñ ḳhvāb rakhnā
kahā ye us ne ki aañkh rakhnā azaab rakhnā

kis ne nazroñ meñ ḳhudā jaane use mal Daalā
nargis aaj aañkh uThātī nahīñ bīmārī se

bosa sanam kī aañkh kā lete hī jaan dī
'momin' ko yaad kyā hajrul-asvad aa gayā

kuchh aañkh band hote hī āñkheñ sī khul ga.iiñ
jī ik balā-e-jān thā achchhā huā gayā

dā.era dar dā.era paanī kā raqs jāvedāñ
aañkh kī putlī ko dariyā ke bhañvar achchhe lage

vo gholā zahr nafrat kā siyāsat ne fazāoñ meñ
guloñ kī aañkh se shabnam lahū ban kar Tapaktī hai

shab-e-hijr meñ aañkh jo band huī tirī zulf kī yaad do chand huī
mirī saañs ulajh ke kamand huī mujhe terī hī zulf-e-dotā kī qasam

zamāna muntazir hai us lahū kā
jo merī aañkh se Tapkā nahīñ hai

koī us se nahīñ kahtā ki ye kyā bevafā.ī hai
churā kar dil mirā ab aañkh bhī apnī churā.ī hai

shafaq kī aañkh kise ro rahī hai muddat se
dyār-o-dasht sabhī kis malāl meñ gum haiñ

kuchh aisī niiñd se jaagī ki phir na soī vo aañkh
jalā kiyā yūñhī kājal tamām raat us kā

udāsiyoñ ke dasht ne thakā diyā bujhā diyā sulā diyā
vo merī aañkh meñ jo thī samundaroñ sī tāzgī kidhar ga.ī

ek manzar pe Thaharne nahīñ detī fitrat
umr bhar aañkh kī qismat meñ safar lagtā hai

sāhil kī aañkh meñ magar aa.ī na kuchh kamī
dariyā meñ laakh laakh talātum huā kiyā

dastaras tere samundar kī hai tujh se bhī pare
tū mujhe aañkh se bāhar bhī Dubo saktā hai

bas ek ḳhauf meñ hotī hai har sahar merī
nishān-e-ḳhvāb kahīñ aañkh par na rah jaa.e

ġhairat-e-ishq to kahtī hai ki ab aañkh na khol
is ke ba.ad ab na koī aur idhar se guzre

aaj jī bhar ke tujhe dekhā to mahsūs huā
aañkh ne sūra-e-yūsuf kī tilāvat kī hai