Tags-Aankh

ḳhat dekhiye dīdār kī sūjhī ye na.ī hai
vaifar kī jagah aañkh lifāfe pe lagī hai

ham-ḳhvābī-e-jānāñ mirī qismat meñ likhī hai
sote meñ zuleḳhā kī tarah aañkh lagī hai

kar rahā huuñ jise badnām galī-kūchoñ meñ
aañkh bhī us se milāte hue maiñ gharā.ūñ

ashk kyā chhalke hamārī aañkh se
lafz bhī āvāz meñ bal khā ga.e

zarra zarra hai tajallī se laḌā.e hue aañkh
kis qayāmat kī numā.ish hai ye pinhāñ honā

us se itnā hī zarā pūchh le kyā biit gayā
dil ye kab ruktā hai phir aañkh ke tar hone tak

aañkh meñ saa.e kī ḳhvāhish peT meñ roTī kī bhuuk
phir bhī kaisī tāzgī thī phuul jaise gaal par

kahāñ haiñ ab vo mahakte hue hasīñ manzar
khulī jo aañkh to ḳhvāboñ se rishta TuuT gayā

ye dil-o-nazar kā mo.āmla bhī bahut ajīb-o-ġharīb hai
kabhī in laboñ pe hañsī rahī kabhī ashk aañkh meñ bhar gayā

apne aañsū dafn hue haiñ aañkh kī giilī qabroñ meñ
apnī chīḳheñ qaid rahī haiñ zehnoñ ke zindānoñ meñ

jaan le lenā jalānā khel hai ma.ashūq kā
aañkh se maarā lab-e-nāzuk se zinda kar diyā

hazār bhes badaltā rahūñ magar is paar
kisī chamaktī huī aañkh kā hadaf huuñ maiñ

qabze pe haath rakh ke 'qalaq' ne milā.ī aañkh
kal har raqīb se sar-e-mahfil alag alag

ab ke ham ne bhī diyā tark-e-ta.alluq kā javāb
hoñT ḳhāmosh rahe aañkh ne bārish nahīñ kī

putliyāñ garmī-e-nazzāra se jal jaatī haiñ
aañkh kī ḳhair miyāñ raunaq-e-bāzār pe ḳhaak

aañkh se chhin ga.e sabhī manzar
lab pe ik dāstāñ to rahne de

detī sharbat hai kise zahr bharī aañkh tirī
ain ehsān hai vo zahr bhī gar detī hai

is khulī aañkh pe khulte nahīñ asrār tire
tū chhupā hai to tujhe chashm-e-nihāñ se dekhūñ

niind aatī hai magar jaag rahā huuñ sar-e-ḳhvāb
aañkh lagtī hai to ye umr guzar jaanī hai

bahut zaḳhm khaa.e mirī aañkh ne
darīda ye manzar siyā jaa.e nā