Tags-Aankh

us aañkh ne jis kī qismat meñ sach-much ke dar-o-dīvār na the
ḳhvāboñ ke nagar ābād kiye hasrat kī nazar karne ke liye

aañkh bhar dekh lo ye vīrāna
aaj kal meñ ye shahr hotā hai

girā na aañkh se aañsū fareb-e-qismat par
sukūn jis se ho vo iztirāb paidā kar

go do ghaḌī tak us ne na dekhā idhar to kyā
āḳhir hamīñ se aañkh laḌī do ghaḌī ke baad

hai mushtarak nazāra-o-nazzārgī kā vasf
ik aañkh meñ to duujā banāyā charāġh meñ

aañkh mūñde hai merī ḳhaak se bhī
yaañ tak us ko ġhubār hai merā

be-jagah aañkh laḌī dekhiye kyā hotā hai
aap jā bhī na sakūñ un ko bulā bhī na sakūñ

o aañkh badal ke jaane vaale
kuchh dhyān kisī kī ājizī kā

boltī aañkh meñ billor kī ruuh
sañg-e-āvāz uThātā kyā hai

maiñ chup rahā to aañkh se aañsū ubal paḌe
jab bolne lagā mirī āvāz phaT ga.ī

dil kī taufīq se miltā hai surāġh-e-manzil
aañkh to sirf tamāshoñ hī meñ kho jaatī hai

dekh lī ham ne dostī terī
ham se ab aañkh bevafā na milā

dil meñ mire jigar meñ mire aañkh meñ mirī
har jā hai dost aur nahīñ miltī hai jā-e-dost

hāl-e-dil ab zabāñ nahīñ kahtī
aañkh kī is tarī se miltā hai

aks-e-ummīd bhī miltā na thā sahrāoñ meñ
aañkh tarsī thī sarāboñ ko safar aisā thā

saañp lipTe hue shāḳhoñ se samar zahr-bhare
jis ke saa.e meñ lagī aañkh shajar aisā thā

aañkh ke āñgan se ḳhvāboñ kā parinda uḌ gayā
raat bhar 'shāhīn' yādoñ kī chitā meñ qaid thā

aañkh kī momī galī pyāsī thī pyāsī hī rahī
shabnamī bādal zamāne kī havā meñ qaid thā

yuuñ to mumkin nahīñ dushman mire sar par pahuñche
pahre-dāroñ meñ koī aañkh jhapak jaatā hai

ye kaisī be-hisī hai ki patthar huī hai aañkh
vaise to āñsuoñ kī kumak bār-hā milī