Tags-Aankh

jān-e-īmāñ hai abhī vo aañkh sharmā.ī huī
kaifiyat meñ Duub kar kyā jaane kyā ho jā.egī

har saañs meñ ghulnā tirī dahlīz kī ḳhushbū
har aañkh kā duurī ke siyah daam meñ rahnā

aañkh se aañkh jab nahīñ miltī
dil se dil ham-kalām hotā hai

na dil meñ koī ġham rahe na merī aañkh nam rahe
har ek dard ko miTā sharāb lā sharāb de

us māh-rū pe aañkh kisī kī na paḌ sakī
jalva thā tuur kā ki sarāsar vo nuur thā

ik umr ḳhvāb meñ guzrī thī rañg bharte hue
khulī jab aañkh to manzar dhulā huā niklā

tujh pe khul jaa.e ki kyā mehr ko shabnam se milā
aañkh ai husn-e-jahāñ-tāb zarā ham se milā

abhī se aañkh meñ aañsū haiñ lab par aah dil meñ dard
ye āġhāz-e-mohabbat hai to phir anjām kyā hogā

ik ḳhvāb-e-tā.irān-e-bahārāñ hai us kī aañkh
ta.abīr-e-abr-o-bād se labrez abhī se hai

vus.at-e-dīd nigāhoñ kā muqaddar na banī
aañkh ke til meñ to aalam bhī simaT aatā hai

ai dil jo ye aañkh aaj laḌā.ī us ne
aur pal meñ laḌā ke phir jhukā.ī us ne

vo be-kasī ki aañkh khulī thī mirī magar
zauq-e-nazar pe jabr ne pahra biThā diyā

manzar thā aañkh bhī thī tamannā-e-dīd bhī
lekin kisī ne diid pe pahra biThā diyā

ham za.īfoñ ko kahāñ aamad o shud kī tāqat
aañkh kī band huā kūcha-e-jānāñ paidā

kaun siyāhī ghol rahā thā vaqt ke bahte dariyā meñ
maiñ ne aañkh jhukī dekhī hai aaj kisī harjā.ī kī

kis mast adā se aañkh laḌī matvālā banā lahrā ke girā
aage to haiñ rāheñ aur kaThin dil pahle hī Thokar khā ke girā

jaise bārish se dhule sehn-e-gulistāñ 'amjad'
aañkh jab ḳhushk huī aur bhī chehrā chamkā

jitne motī gire aañkh se jitnā terā ḳhasārā huā
dast-basta tujhe kah rahe haiñ vo saarā hamārā huā

fazā-e-ḳhvāb-e-tarab ne jagā diyā mujh ko
lagī jo aañkh to hone lagā saverā bhī