Tags-Aankh

jidhar tum ho
usī jānib manāzir aañkh malte haiñ

aao ye ḳhāmoshī toḌeñ ā.īne se baat kareñ
thoḌī hairat aañkh meñ bhar leñ thoḌī sī ḳhairāt kareñ

dil se kisī kī āñkhoñ tak kuchh raaz kī bāteñ pahuñchī haiñ
aañkh se dil tak aayā ho aisā to koī paiġhām nahīñ

ab vo pahlī sī fazāoñ meñ kudūrat na rahī
haañ mirī aañkh meñ halkā sā dhuñdlakā hai zarūr

rahe na aañkh to kyuuñ dekhiye sitam kī taraf
kaTe zabān to kyuuñ harf-e-nā-ravā kahiye

laḌkiyāñ maaoñ jaise muqaddar kyuuñ rakhtī haiñ
tan sahrā aur aañkh samundar kyuuñ rakhtī haiñ

samundar kī tarah vo shānt lekin
lahhū us aañkh se Tapkā na hogā

raho Tuk 'azfarī' ab chashm khole
raheñgī aañkh phir shām-o-sahar band

tujhe ḳhurshīd-rū, jī bhar ke dekhūñ
huī jaatī hai merī aañkh par band

ḳhāmosh chhat ko taktī hai
aur ek aañkh jo sab dekhtī hai

usī chashm-e-nigarāñ ke sadqe
aañkh agar ḳhushk nazar aa.e bahut rotī hai

apne ahvāl pe ham aap the hairāñ baabā
aañkh dariyā thī magar dil thā bayābāñ baabā

bajā hai ḳhvāb-navardī pa ḳhvāb aaise hoñ
khule jo aañkh to apnā hī ghar khañDar na lage

tum apne ḳhvāb bachā kar rakkho ki kal duniyā
tumhārī aañkh meñ jhāñke to zindagī dekhe

dabī thī aañkh kabhī jis makān-e-hairat se
ab us makāñ se ziyāda hai lā-makān kā bojh

ga.e dinoñ kā koī ḳhvāb dafn hai shāyad
ki ab bhī aañkh se ristā hai bāqiyāt kā dukh

ye jo rote haiñ liye aañkh meñ TuuTe taare
apne chehre pe kabhī chāñd sajā rakhte the

aañkh ne dekhā magar kyā dekhā
aql ne aur bhī khaa.e dhoke

lahr us aañkh meñ lahrā.ī jo be-zārī kī
ham ne hañste hue phir kuuch kī tayyārī kī

jab bhī is ālam-e-kam-hoshī meñ
dastak-e-dil se aañkh khul jaa.e