Tags-Aankh

is liye dekhtā rahtā huuñ musalsal tujh ko
aañkh mahrūm-e-basārat bhī to ho saktī hai

aañkh vaale sāvan meñ ek baat dekhī hai aur kah bhī duuñ tum se
tishnagī miTātā hai dil kī tishnagī kā ye qudratī shikārī hai

na aañkh band karūñ maiñ to kyā karūñ yārab
vo aa rahe haiñ tamāshā-e-jāñ-kanī ke liye

sab kā dāman motiyoñ se bharne vaale
merī aañkh meñ bhī ik aañsū rakhnā thā

kisī kī aañkh se aañsū Tapak rahe hoñge
tamām shahr meñ jugnū chamak rahe hoñge

tamām ashk sarāboñ meñ Dhal ga.e 'arshad'
shikasta aañkh meñ sahrā uThā ke laayā huuñ

kahīñ kahīñ to mujhe aañkh ḳharch karnā paḌī
nafīs paañv ke chhāle talāsh karte hue

phir ek sub.h mujhe aañkh phoḌnā paḌī thī
hasīn ḳhvāb ke reshe talāsh karte hue

ek hī lamhe meñ tasḳhīr karegī use aañkh
par vo lamha mire aflāk se bāhar hai abhī

na jaane kab se badan the adhūre ḳhvāboñ ke
tumhārī aañkh meñ tābīr kar rahī huuñ maiñ

dil se jaatī nahīñ Thahre hue qadmoñ kī sadā
aañkh ne svāñg rachā rakkhā hai bīnā.ī kā

pahle hamārī aañkh meñ bīnā.ī aa.ī thī
phir is ke ba.ad quvvat-e-goyā.ī aa.ī thī

koī ghaḌī hai ki hotā huuñ āstīn meñ dafn
maiñ dil se bahtā huā aañkh tak to aa gayā huuñ

aañkh se rūmāl sarkā ba.ad-e-marg
chashm-e-tar kā aaj pardā khul gayā

phir tīrgī-e-shab meñ nazar aa.ī na.ī shakl
ab dekh ki kis ḳhvāb kā dar aañkh pe vā hai

zāviya-dar-zāviya manzar badalte jā.eñge
aañkh saarī aañkh bhar ye zindagī taḌpā.egī

bahut royā judā ho kar vo shāyad
tabhī to aañkh meñ haale paḌe haiñ

laḌā.eñ aañkh vo tirchhī nazar kā vaar rahne deñ
laḌakpan hai abhī nām-e-ḳhudā talvār rahne deñ

parda bhī jalva ban jaatā
aañkh tajallī-sāz kahāñ hai

aañkh meñ aañsū lab pe ḳhamoshī
dil kī baat ab raaz kahāñ hai