Tags-Aankh

haañ siine se numā.ish dāġh-e-darūñ daroġh
haañ aañkh se tarāvish-e-ḳhūn-e-jigar ġhalat

kabhī yuuñ bhī aa mirī aañkh meñ ki mirī nazar ko ḳhabar na ho
mujhe ek raat navāz de magar is ke baad sahar na ho

vo aañkh kyā jo aariz o ruḳh par Thahar na jaa.e
vo jalva kyā jo diida o dil meñ utar na jaa.e

paḌtī nahīñ hai aañkh ke sāhil pe surḳh dhuup
kartā maiñ ārzūoñ ke lāshe hanūt kyā

dekhne vāloñ kī jānib dekho
is tarah aañkh churāyā na karo

tai huā nazm hī mustaqbil hai pān-sau bil hai bha.ī pyāro
aañkh na maaro ġhazal hamāre hasab-nasab kā hissa hai

dām-o-qafas na chāhiye dil ke shikār kuuñ
kartī haiñ band aañkh ke Doroñ kī Doriyāñ

na jaane aa ga.e kyuuñ us kī aañkh meñ aañsū
jo hañs rahā thā mire dard ke fasāne par

un ke hāthoñ kī tanābeñ haiñ zamīñ par lipTī
shahr kī aañkh se manzar na uThā leñ ye kahīñ

rāz-e-ḳhirad ho kuchh bhī ab rāz-e-junūñ to ye hai bas
aañkh thī be-basar rahī tiir thā be-kamāñ gayā

jab se dilbar ne aañkh pherā hai
mujh ko daurān-e-sar ne gherā hai

armān-e-vasl yūñhī rahā so ga.e nasīb
jab aañkh khul ga.ī to yakāyak sahar huī

pachhtātā huuñ ki aañkh abas tum se laḌ ga.ī
barchhī hamāre haq meñ tumhārī nazar huī

vo imtizāj thā aisā ki dañg thī har aañkh
jamāl-e-yār ne pahnī qabā udāsī kī

zindagī bhar aañkh se aañsū nadāmat ke gire
aur mere dil kā suffā yuuñ hī saada rah gayā

nā-rasā.ī koī kis aañkh se dekhe apnī
ham bhī TuuTe hue par, raat bhī tūfānī thī

chalī hai hijr ke mausam meñ jab bhī purvā.ī
huī hai aañkh mirī nam tire havāle se

buuñd bhar ashk bhī Tapkā na kisī ke ġham meñ
aaj har aañkh koī abr-e-tahī lagtī hai

aañkh mānūs-e-tamāshā nahīñ hone paatī
kaisī sūrat hai ki har roz na.ī lagtī hai

kitne dar vā haiñ kahīñ aañkh milā.eñ to sahī
is na.e shahr se kuchh rabt baḌhā.eñ to sahī