Tags-Aankh

dil meñ kyā kyā havas-e-dīd baḌhā.ī na ga.ī
rū-ba-rū un ke magar aañkh uThā.ī na ga.ī

dil kī gāhak achchhī sūrat ho ga.ī
aañkh milte hī mohabbat ho ga.ī

vo aaj mujh se milā hai to kitnā banjar hai
jo apnī aañkh meñ sāvan ke rañg rakhtā thā

ro ro ke log kahte the jaatī rahegī aañkh
aisā nahīñ huaa, mirī bīnā.ī baḌh ga.ī

aañkh se bichhḌe kājal ko tahrīr banāne vaale
mushkil meñ paḌ jā.eñge tasvīr banāne vaale

ham se do-chār bazm meñ dhyān aur kī taraf
aañkh is taraf lagā.ī hai kaan aur kī taraf

nahīñ sūjhā jo ab us kā abhī tak
kisī kī aañkh ne pūchhā hai jo kuchh

raat ab harīf-e-sub.h-e-qayāmat hī kyuuñ na ho
jo kuchh bhī ho us aañkh ko ab to jagā diyā

hiran kī aañkh meñ dahshat thī zinda
magar ye chashm hairat kī tarah thī

kisī ke hoñTh par hañstī haiñ phūloñ kī davā.eñ
kisī kī aañkh meñ chhup kar samundar bolte haiñ

dekhtā rahtā huuñ miTte shahr ke naqsh-o-nigār
aañkh meñ vo sūrateñ bhī haiñ ki galiyoñ meñ nahīñ

khul rahī hai aañkh ik kāfir hasīñ kī sub.h-dam
mai-kasho muzhda dar-e-mai-ḳhāna vā hone ko hai

āvāra haiñ is aañkh se us aañkh talak ḳhvāb
jaise ki musāfir kā koī ghar nahīñ hotā

shukr ban jaate haiñ aate hī zabāñ tak shikve
jaane kyā baat hai us aañkh ke sharmāne meñ

milūñgā ḳhaak meñ aañsū kī tarah yaad rahe
milo na aañkh kahīñ aañkh se girā ke mujhe

har aañkh ko ham sāġhar-o-mīnā nahīñ kahte
har aañkh pe ham tohmat-e-bāda nahīñ rakhte

aañkh tumhārī mast bhī hai aur mastī kā paimāna bhī
ek chhalakte sāġhar meñ mai bhī hai mai-ḳhāna bhī

ab ye aalam hai ki ġham kī bhī ḳhabar hotī nahīñ
ashk bah jaate haiñ lekin aañkh tar hotī nahīñ

uTh ga.ī aañkh agar merī to jam jā.egī
aap ne dīda-e-har-sū-nigrāñ dekhe haiñ

kabhī vo tabassum-e-zer-e-lab kabhī ḳhāmushī se vo be-sabab
kabhī sarḳhushī kabhī aañkh nam tumheñ yaad ho ki na yaad ho