Tags-Aankh

mirī aañkh kā vo chhalaknā dikhā kyā
kisī roz hamdam ye rāhat hī diije

pistol kī tarah aañkh to golī kī tarah hoñT
aur naak to bandūq kī naalī kī tarah thī

qarīb maut khaḌī hai zarā Thahar jaao
qazā se aañkh laḌī hai zarā Thahar jaao

savere aañkh khulī to nazar meñ kuchh bhī na thā
ḳhayāl-o-ḳhvāb meñ pā.īñ bashārateñ kyā kyā

goggle lagā ke aañkh par chalne lage hasīn
vo lutf ab kahāñ nigah-e-nīm-bāz kā

safar meñ shal hue jaate huuñ dhuup ke paañv
ufuq kī aañkh se bahtī huī hinā dekheñ

chup rahe ham to ḳhuuñ huā dil kā
baat kī hai to aañkh bhar aa.ī

ham arz-e-vafā bhī kar na sake kuchh kah na sake kuchh sun na sake
yaañ ham ne zabāñ hī kholī thī vaañ aañkh jhukī sharmā bhī ga.e

hamārī aañkh lagī hai ghaḌī kī suuī par
hamārī nabz musalsal phaḌak rahī hai ab

kisī tarah mujhe ḳhud ko sambhālnā hogā
udāsī aañkh se bāhar chhalak rahī hai ab

aañkh se ġham nihāñ nahīñ hote
phir bhī aañsū ravāñ nahīñ hote

manzar nahīñ haiñ bolte sahrā udaas hai
pathrā ga.ī hai aañkh dil-e-dāġhdār chup

nargis us ġhairat-e-gul-zār se kyā aañkh milā.e
aañkh bhī vo ki nahīñ jis ko mayassar palkeñ

ye darāzī hai ki vo shoḳh jidhar aañkh uThā.e
jā pahuñchtī haiñ nigāhoñ ke barābar palkeñ

aañkh se bah jā.egā dil meñ agar baaqī rahā
qatra-e-ḳhūñ dāstān-e-dard kī takmīl tak

kitāb-e-sabz o dar-e-dāstān band kiye
vo aañkh so ga.ī ḳhvāboñ ko arjumand kiye

maiñ ne to us se aañkh laḌā.ī nahīñ kabhī
abrū ne mujh pe khīñchī hai talvār be-sabab

rāz-e-alam se hai shāyad ki mirā raaz judā
mujh se milne meñ hai us aañkh kā andāz judā

hone kī ik jhalak sī dikhā kar chalā gayā
kholī thī ham ne aañkh ki manzar chalā gayā

hijr ke din kī raat huī barsāt huī
aañkh se dil kī baat huī barsāt huī