Tags-Aankh

ajiib dil meñ mire aaj iztirāb sā hai!
khulī hai aañkh samundar bhī ek ḳhvāb sā hai!

aañkh imkān se bharī huī thī
aur maiñ ḳhvāb meñ Darī huī thī

ḳhvāb is dil pe tirī aañkh ne Dore Daale
ḳhuub kājal ne tirī aañkh meñ Dorā khīñchā

vo tire dil meñ hamārī bhī jagah kar degā
jis ne is aañkh ke til meñ tirā naqshā khīñchā

binā thī aish-e-jahāñ kī tamām ġhaflat par
khulī jo aañkh to goyā ki ahtelām huā

na jaane kyuuñ mujhe chubhtā hai āj-kal 'hamdam'
mirī hī aañkh se likkhā huā nazārā koī

abhī vo aañkh bhī soī nahīñ hai
abhī vo ḳhvāb bhī jaagā huā hai

nargis ko to aañkh uThā ke dekho
kis yaas se tum ko tak rahī hai

vo ek shai jo kabhī aañkh meñ nahīñ utrī
tū bhī to us kā talabgār hai nahīñ hai kyā

yaad un kī satātī rahī rāt-bhar
aañkh aañsū bahātī rahī rāt-bhar

itne be-rañg ujāloñ se nazar guzrī hai
hausla aañkh ko ab ḳhvāb-e-hasīñ kā na rahā

nahīñ hai maslahat-e-ġham ko aarzū tirī
tirā jo ġham bhī na hotā to aañkh nam hotī

junūñ ziyāda bahut hotā aql kam hotī
maiñ qahqaha bhī lagātā to aañkh nam hotī

kaisī thī mai jo aañkh se tū ne pilā.ī thī
merī ragoñ meñ aaj tak us kā ḳhumār thā

kab se baiThe haiñ mirī aañkh kī añgnā.ī meñ
ḳhvāb bachchoñ kī tarah shor machāne ke liye

maiñ ḳhud ko marte hue dekh kar bahut ḳhush huuñ
ye Dar bhī hai ki mirī aañkh khul na jaa.e kahīñ

aib apnī aañkh kā yā faiz terā kyā kahūñ
ġhair kī sūrat pe mujh ko terā dhokā ho gayā

parā.e dasht meñ nīndeñ luTā ke aa.ī huuñ
par us kī aañkh meñ sapne sajā ke aa.ī huuñ

sunte haiñ us ne DhūñD liyā aur koī ghar
ab tak jo aañkh thī tire dar par lagī huī

maiñ aThārah saal kī thī jab mere ghar pahlā patthar girā aur phir mujhe do ajnabī hāthoñ ne narmī se thāmā
baabā kī aañkh nam ho ga.ī kyūñki maiñ ro rahī thī