Tags-Aankh

adū jis tarah tum ko dekhtā hai ham samajhte haiñ
chhupāo laakh tum chhuptī nahīñ hai aañkh mahram kī

kalī ḳhumār ke aalam meñ kasmasātī hai
khulī hai aañkh magar niiñd kā asar hai bahut

ārām-e-jāñ thā ḳhvāb-e-sukūñ aañkh jab khulī
sail-e-fanā utar gayā miTTī bikhar ga.ī

na pūchh mujh se tire qurb kā nasha kyā hai
tū apnī aañkh meñ Dore mire ḳhumār ke dekh

raste meñ aañkh thī sag-e-māmūr kī tarah
dil meñ jo chor thā vo kidhar se nikal gayā

be-kal be-kal rahnā diid kā phal to nahīñ hai
dekhne vaalī aañkh ne jaane kyā nahīñ dekhā

dekhne niklā huuñ duniyā ko magar kyā dekhūñ
jis taraf aañkh uThā.ūñ vahī chehra dekhūñ

kaan se ham to 'firāq' aañkh kā lete haiñ kaam
aaj chhup kar koī āvāz par āvāz to de

koī paiġhām-e-mohabbat lab-e-ejāz to de
maut kī aañkh bhī khul jā.egī āvāz to de

aañkh se kyā maiñ to apne dil se bāhar ho gayā
raqs hī aisā thā har ik dā.era kam paḌ gayā

dekh parvānoñ ke raqs-e-betāb ko sham.a aane na de aañkh meñ ḳhvāb ko
ek jhapkī sī aa.ī thī mahtāb ko aañkh kholī to koī sitārā na thā

allāh se aañkh laḌāne pe
shaitāñ ko insāñ khaltā hai

chhalke sāgar aañkh nashīlī
nargis meñ añgūr nichoḌe

tumheñ ġhamoñ kā samajhnā agar na aa.egā
to merī aañkh meñ aañsū nazar na aa.egā

hamārī aañkh meñ utre haiñ saat rañg ke ḳhvāb
hamārā haq hai ki ham deñ duā mohabbat ko

yuuñ aañkh un kī kar ke ishāra palaT ga.ī
goyā ki lab se ho ke kuchh irshād rah gayā

sunā hai DhūñDte phirte haiñ kab se kūza-garāñ
hamārī aañkh kā paanī tire dayār kī ḳhaak

sāqiyā dil meñ jo tauba kā ḳhayāl aatā hai
duur se aañkh dikhātā hai tirā jaam mujhe

'safīr' ab tak to rūdād-e-mohabbat ḳhaam hai terī
abhī to aañkh bhī fart-e-alam se nam nahīñ hotī

gulzār-e-jahāñ par na paḌī aañkh hamārī
kotāh thī umr apnī habāb-e-lab-e-jū se