Tags-Education

maiñ ab bhī Darte Darte apne haq kī baat kartā huuñ
mirī ta.alīm meñ Dar kā baḌā hissa rahā hogā

ta.alīm ashk-o-āh se lī mere abr ne
jo yuuñ baras rahā hai dhuāñ-dhār dekhnā

aap agar mā.il-e-tajdīd-e-sitam ho jaa.eñ
rañg-e-ta.alīm-e-vafā aur nikhar jā.egā

tifl meñ bū aa.e kyā maañ baap ke atvār kī
duudh to Dibbe kā hai ta.alīm hai sarkār kī

ġham-e-hayāt kī ta.alīm-o-tarbiyat ke liye
tirī nigāh ke ahkām lete rahte haiñ

kasrat-e-āzār ne ta.alīm de dī zabt kī
jabr ke baa.is se dil ko sabr karnā aa gayā

paa.ī hai maiñ ne zaḳhm se tālīm-e-ḳhāmushī
goyā lab-e-sukūt dahan haiñ javāb ke

partav-e-ḳhur se hai shabnam ko fanā kī ta.alīm
maiñ bhī huuñ ek ināyat kī nazar hote tak

ḳhānqāhoñ ke jigar-dāroñ meñ hañgām-e-jidāl
pās-e-qur.āñ pās-e-ta.alīm-e-payambar dekhiye

'maḳhfī' panāh-e-chādar-e-zehrā na chhoḌnā
ta.alīm-e-nau sunā hai ki dushman hayā kī hai

andalīboñ ko milī āh-o-bukā kī tālīm
aur parvānoñ ko dī soz-e-vafā kī tālīm

yahāñ dimāġh nahīñ dil kī hotī hai ta.alīm
huzūr-e-ishq ke maktab kā kuchh nisāb nahīñ

satānā qatl karnā phir jalānā
vo be-ta.alīm kyā kyā jānte haiñ

nahīñ mauj-e-dariyā kī dahshat use jo ki maarā hai ġhota ho ġhavvās dil meñ
tah-e-bahr-e-vahdat meñ ġhavvās hone ko ta.alīm paane nahañgoñ meñ rahiye

pyaas meñ dīda-e-darvesh ne ta.alīm ye dī
mai-kade jaao jahāñ jaam baTā karte haiñ

islām kī ta.alīm farāmosh huī kyuuñ
insān kī tāzīm farāmosh huī kyuuñ

islām kī ta.alīm se begāna huā tū
nā-mahram-e-har-jur.at-e-rindāna huā tū

qaum ko shuddhī kī ta.alīm kā unvāñ de kar
qaum ko ġhair ke panje se chhuḌātā aayā