Tags-Ehsaan

kisī kā ehsān ham na leñge kisī ko taklīf kuchh na deñge
ḳhudā ne paidā kiyā hai ham ko ḳhudā hī se iltijā kareñge

hamārī intihā-e-nā-tavānī hadd-e-manzil hai
salāmat larzish-e-pā kaun le ehsān rahbar ke

zindagī chhoḌ ga.ī be-sar-o-sāmān mujhe
umr-bhar yaad rahā aap kā ehsān mujhe

koī detā hai kisī ko bhī to kyā detā hai
dast-e-ehsān ko mīzān pe lā detā hai

phir jī uThe haiñ jis se vo imkān tum nahīñ
ab jo bhī kar rahā hai ye ehsān tum nahīñ

tirā ehsān hai mujh par mirī jaañ
tire ġham kī badaulat likh rahā huuñ

ham pe mushtarka haiñ ehsān ġham-e-ulfat ke
itne ehsān ki ginvā.ūñ to ginvā na sakūñ

kam na thā us kā ye ehsān ki jaate jaate
kar gayā aur bhī lambā mirā saaya sūraj

apne dāman par haiñ 'shakīl' apne aañsū
log magar ehsān jatā.e jaate haiñ

ehsān sar pe laġhzish-e-mastāna kā huā
ham do qadam na jā sake mai-ḳhāna chhoḌ kar

ehsān le na himmat-e-mardāna chhoḌ kar
rasta bhī chal tū sabza-e-begāna chhoḌ kar

ghar us ne banāyā thā ik sabr o razā kar ke
miTTī meñ milā Daalā ehsān jatā kar ke

ik baar thā sar gardan-e-'hasrat' pe raheñge
qātil tirī shamshīr ke ehsān hazāroñ

na kuchh ḳhatra ḳhizāñ kā hai na ehsān-e-bahār us par
adam se apnī shāḳh-e-ārzū be-barg-o-bār aa.ī

laakh laakh ehsān jis ne dard paidā kar diyā
jis ne is dil ko hathelī kā phaphūlā kar diyā

baqā kahte haiñ jis ko vo mirā ehsān hai 'fānī'
vo hādis huuñ ki duniyā-e-qadam bhartī hai dam merā

adl ko bhī mīzān meñ rakhnā paḌtā hai
har ehsān ehsān meñ rakhnā paḌtā hai

kisī se milne aa.e the so yaañ bhī ho chale ik dam
kahe detā huuñ ye mujh par nahīñ ehsān milne kā

kuchh hamīñ ko nahīñ ehsān uThāne kā dimāġh
vo to jab aate haiñ mā.il-ba-karam aate haiñ

gard-e-shohrat ko bhī dāman se lipaTne na diyā
koī ehsān zamāne kā uThāyā hī nahīñ