Tags-Ehsaan

ham aur rasm-e-bandagī āshuftagī uftādgī
ehsān hai kyā kyā tirā ai husn-e-be-parvā tirā

ḳhud-shanāsī ke lamhe baham kab hue ham jo the dar-haqīqat vo ham kab hue
terā ehsān ho tū batā de agar kuchh hameñ bhī hamārā nishāñ yā aḳhī

ishq ehsān se ibārat hai
ishq-e-nādāñ nazar nahīñ aatā

marhabā bandagī-āmoz tasavvur terā
jis ke ehsān se pahuñchā huuñ maiñ ehsāñ ke qarīb

ḳhudā chāhe to ab ke qatl-gah meñ mushkil āsāñ ho
tire bīmār-e-nāhaq maut kā ehsān lete haiñ

mas.ala us kī anā kā thā ki shohrat kī talab
us kā har ehsān mujh par nekiyāñ Dhātā rahā

aaj insāñ ne bhulā Daale haiñ yazdāñ ke karam
ham ne to zulm bhī ehsān tire jaane haiñ

karūñ kyā bayāñ maiñ ye ehsān-e-ishq
ki qatre se dariyā banāyā mujhe

ehsān-e-tīr-e-yār adā ho sakegā kyā
jaan apnī nazr-e-lazzat-e-paikāñ hī kyuuñ na ho

tū ne ehsān kiyā apnā banā kar mujh ko
varna maiñ kyā thā haqīqat na fasāna mire dost

saath dene kā to ehsān hai mujh par lekin
sham.a ne naam Duboyā mirī tanhā.ī kā

sahtā huuñ sitam us ke ehsān hai duniyā par
gar maiñ na vafā kartā kyā jāniye kyā hotā

ye kaun merī zaat par ehsān kar gayā
ye kaun mar gayā hai bachāte hue mujhe

ek lamha vo pazīrā.ī karegā aur maiñ
umr-bhar sāya-e-ehsān meñ rah jā.ūñgā

kisī bhī haal meñ pahuñche to haiñ kināre par
yahī bahut hai ki ehsān-e-nāḳhudā na liyā

dījiye dījiye hai ain sa.ādat apnī
āshiqoñ par to hai ehsān ye gaalī denā

ehsān-e-afv-e-jurm se vo sharmsār huuñ
baḳhshā gayā maiñ to bhī gunahgār hī rahā

duniyā ke har fareb ko ehsān maan kar
duniyā kā hausla na baḌhā.eñ to kyā kareñ

kam-nigāhī bhī hai ḳhāmoshī bhī rūposhī bhī
kitnī ma.asūm hai ehsān-farāmoshī bhī

sar agar jaa.e to jaa.e magar ai ḳhanjar-e-yār
sar se apne tire ehsān kahāñ jaate haiñ