Tags-Ehsaas

so.e hue zarre jaag uThe anvār-e-sahar bedār hue
ehsās-e-zamīñ bedār huā afkār-e-bashar bedār hue

ehsās kī vaadī meñ koī saut na sūrat
ye manzil-e-irfān tak aane kā sila hai

akele-pan kā 'azmī' ho bhī to ehsās kaise ho
tasalsul se hamārī shām-e-tanhā.ī safar meñ hai

ḳhud-farebī baḌh ke jab bantī hai ehsās-e-shu.ūr
jab javāñ hotā hai ahl-e-zar ke tevar meñ ġhurūr

'sham.a' mat toḌnā ehsās kā ā.īna agar
guzre vaqtoñ kā koī aks utartā dekhūñ

bashar ko quvvat-e-ehsās ne ḳharāb kiyā
jo ye na ho to jahāñ meñ na phir ziyāñ hai na suud

ghar meñ kuchh kam hai ye ehsās bhī hotā hai 'salīm'
ye bhī khultā nahīñ kis shai kī kamī lagtī hai

talḳhī kā naza.a kī to kuchh ehsās ho sake
itnī to mere muñh meñ ho talḳhī sharāb kī

us kī bātoñ pe ḳhafā mat honā
'farhat' ehsās to saudā.ī hai

maiñ us ke sāmne se guzartā huuñ is liye
tark-e-ta.alluqāt kā ehsās mar na jaa.e

jab bhī ehsās-e-amāñ bā.is-e-taskīñ Thahrā
an-ginat ḳhatroñ kī aahaT se dil apnā dhaḌkā

aa gayā hai ai falak zarroñ ko ehsās-e-ḳhudī
maiñ samajhtā huuñ ki vaqt-e-intiqām aa hī gayā

tamhīd-e-qayāmat hai ik raat kā hañgāma
ehsās kī sham.eñ haiñ jazbāt ke parvāne

lekin baḌā.ī kā koī ehsās kab rahā
chakkar thā duniyā-dārī kā chakkar meñ aa gayā

jaane kyuuñ log taraste haiñ bahāroñ ke liye
ham to ehsās kī shiddat hī se jal jaate haiñ

be-ḳhudī meñ bhī raqābat kā magar hai ehsās
ek sahrā meñ hai dīvāne se dīvāna judā

dil meñ jab ehsās kā sho.ala farozāñ ho gayā
nuur afshāñ har charāġh-e-bazm-e-imkāñ ho gayā

naġhme bikhertā rahā ehsās-e-talḳh bhī
ḳhāma bhī mere haath meñ mizrāb sā rahā

ārām-o-musībat kyā shai hai hotā nahīñ kuchh ehsās unheñ
manzil kī jo dhun meñ haiñ 'sābir' din-rāt vo chalte rahte haiñ

miTā diye haiñ sab ehsās uf re zauq-e-sharāb
surūr kam na ho turshī bhī gar milā ke piyūñ