Tags-Ehsaas

rañg barsātī vahī sub.h vahī bhīgtī shaam
vahī ehsās meñ Duube hue saa.e dekhe

dilā rahā huuñ maiñ us ko ehsās us kī pahlī rafāqatoñ kā
jo aaj 'iqbāl' merī būd-o-nabūd se āshnā nahīñ hai

ab to ehsās-e-tamannā bhī nahīñ
qāfila dil kā luTā ho jaise

apnī lau meñ koī Duubā hī nahīñ
chāñd ehsās kā ubhrā hī nahīñ

thoḌī sī aur zaḳhm ko gahrā.ī mil ga.ī
thoḌā sā aur dard kā ehsās ghaT gayā

afsar-e-duniyā saḳht sahī 'farhat-ehsās' haiñ āḳhir ham bhī
daftar meñ bhī apnī sī kuchh kār-guzārī kar lete haiñ

aisā kyā jurm huā hai ki taḌapte marte
apne ehsās kī suulī pe anā ko dekhūñ

dard-mandoñ se taġhāful kab tak
us ko ehsās dilāyā jaa.e

soz-e-āfāq kā ehsās bhī ham ko na huā
itnā behosh kiyā terī adā ne ham ko

dard aisā diyā ehsās-e-vafā ne ham ko
na davā ne hī shifā dī na duā ne ham ko

ḳhud ko bhūle hue guzre haiñ zamāne yaaro
ab mujhe tum mirā ehsās dilāte kyuuñ ho

gahre shahroñ meñ rahne se azmat kā ehsās miTā
lambe hamloñ par jaane kā qudrat se Takrāne kā armān miTā

gahre shahroñ meñ rahne se vus.at kā ehsās miTā
lā-mahdūd ḳhalāoñ kī ḳhāmoshī kā

tere ehsās ko tasvīr karūñ
ab to kāġhaz pe ubhar bāteñ kar

ehsās bhī na thā ki hai patthar mirā badan
haañ Dūbnā paḌā hai ubharne kī aas par

ehsās par muhīt the lafzoñ ke dā.ere
lafzoñ ke dā.eroñ meñ magar zindagī to thī

mujhe dilātī haiñ jañgal meñ hone kā ehsās
ye shahr vāloñ kī ayyār-o-hoshiyār āñkheñ

iimā kā hai faizān ki ehsās kā ehsān
ek ek jafā meñ hai mudārāt kā aalam

jahān-e-ārzū āvāz hī āvāz hotā hai
baḌī mushkil se ehsās-e-shikast-e-sāz hotā hai

shahr-e-anā meñ aa.ine ke rū-ba-rū huuñ maiñ
ehsās kī nazar se mirā hausla bhī dekh