Tags-Ehsaas

dekh lete haiñ andhere meñ bhī rasta apnā
sham.a ehsās ke mānind jalī rahtī hai

zulmat se nikal aa.eñ chamakte hue raste
par mash.al-e-ehsās sharar-bār nahīñ hai

kamāl par hai ye ehsās in dinoñ 'nusrat'
koī hameñ bhī yahāñ bā-kamāl chāhiye thā

bikhre hue tinke chun chun kar ta.amīr nasheman kar to liyā
ta.amīr-e-nasheman se lekin ehsās-e-tabāhī kam na huā

phaTe-hāl aisā yahāñ koī aur ab kahāñ hai
zarā ġhaur se dekhnā farhat-ehsās hī hai

kisī ko paane kā ehsās is tarah se rahe
to bazm-e-dost se dushman ko hī uThā diyā jaa.e

dekhā tumheñ jab se ehsās ke āñgan meñ
har jazba-e-ḳhvābīda bedār sā lagtā hai

ḳhaak hote ātish-e-ehsās-e-mahrūmī se dil
barf-e-māyūsī meñ jakḌe zehn aksar duur tak

jab tajraba kī dhuup meñ ehsās aayā
alfāz ne pairāhan-e-sherī baḳhshā

ek arse se
jazbāt-o-ehsās kī vādī-e-ishq kī bastī

maiñ ba-zāhir to huuñ ik zarra zamīñ par lekin
apne hone kā hai ehsās mukammal mujh meñ

mujh ko tirī nāzukī kā ehsās
daurān-e-visāl bhī rahegā

tum saath ho to dhuup kā ehsās tak nahīñ
ye dopahar to shaam se aage nikal ga.ī

dekhūñ to 'fidā' lafz hai ehsās kā hāsil
sochūñ to ma.ānī mire lahje meñ nahīñ hai

apnā ehsās ho rahā hai mujhe
mujh se mujh ko judā kare koī

aap ne dekh ke har ik ko nazar pherī hai
aap ne sāhib-e-ehsās kahāñ dekhe haiñ

muddatoñ ke ba.ad phir nam ho ga.iiñ āñkheñ mirī
phir mire ehsās ke patthar meñ dil dhaḌkā kahīñ

ḳhud apnī hī fazā meñ ḳhauf kā ehsās har lamha
adam-mahfūziyat kā duur tak ġhamnāk sannāTā

terī qurbat meñ guzāre hue kuchh lamhe haiñ
dil ko tanhā.ī kā ehsās dilāne vaale

us se milne kī fazā saaf nahīñ thī koī
har guzargāh pe ehsās kā pahrā niklā