Tags-Ehsaas

vahī jahān-e-havādis vahī khulī āñkheñ
qarīb-e-marg hai ehsās dañg hone kā

ā.īne ko ḳhud toḌ rahā ho jaise
ehsās kā ruḳh moḌ rahā ho jaise

bas lahū kī buuñd thī ehsās meñ
phir ugāyā dasht ne ik sar nayā

un kī jannat meñ rahe ham to ye ehsās huā
apne vīrānoñ meñ ham ḳhāk-basar achchhe the

ek ehsās-e-shikast-e-shab bahut raushan magar
be-karāñ is be-hisī ke darmiyāñ dekhegā kaun

ajnabiyyat kā vo ehsās thā merī qismat
vo jo apnā nahīñ lagtā thā mirā apnā thā

majbūr-e-ġham-e-duniyā dil se to koī pūchhe
ehsās kī rag meñ hai ḳhār-e-ġham-e-jānāñ bhī

farhat-ehsās se aatī thī sadā-e-girya
āḳhir-kār vo duniyā kā azā-ḳhāna banā

yahī ehsās dil ko Das rahā hai
tū merā ho ke bhī merā nahīñ hai

ehsās mirā hijr-gazīda hai azal se
kyā mujh ko agar koī qarīb-e-rag-e-jāñ hai

lazzat-e-dard milī ishrat-e-ehsās milī
kaun kahtā hai ham us bazm se nākām aa.e

tere ġham ke charāġhoñ kī sad-rañg zau ik kiran de sakegī na ehsās ko
bazm-e-jāñ itnī sunsān ho jā.egī shahr-e-dil itnā vīrān ho jā.egā

vahī log jiine kā fan jānte haiñ
jo ehsās-e-sūd-o-ziyāñ chhoḌ aa.e

mutma.in garmī-e-ehsās-e-jafā se bhī nahīñ
dil ko pahuñche bhī to ārām kahāñ tak pahuñche

aaj sochā hai ki ehsās ko zaa.il kar duuñ
apne shorīda irāde ko apāhij kar luuñ

jin ko nahīñ thī daulat-e-ehsās tak nasīb
takrīm-e-be-nazar meñ vahī devtā rahe

magar mujh ko ye ehsās-e-nadāmt maar Dālegā
parā.e peḌ se phal toḌ kar do chaar le aayā

ho mulāqāt aur ehsās-e-mulāqāt na ho
terā milnā jo yahī hai to bichhaḌnā kyā hai

aaj tak ehsās kī chilman se uljhā hai ye mub.ham sā savāl
us ne āḳhir kyuuñ bunā thā bahkī nazroñ se hasīñ chāhat kā jaal

apne miTne kā bhī ġham hotā hai is ehsās se
maiñ nahīñ apnā magar terā to kahlātā huuñ maiñ