Tags-Ehsaas

shā.irī tanhā.ī kī raunaq hai mahfil kī nahīñ
'farhat-ehsās' apnā ye darbār kam kar dījiye

mujh ko ġham kā na kabhī dard kā ehsās rahā
har ḳhushī paas thī jab tak tū mire paas rahā

ai mire sher ke naqqād tujhe hai ye gila
ki nahīñ hai mire ehsās meñ sarmastī o kaif

dil ke madfan meñ 'tapish' dafn hai ehsās kā jism
tum ne chhoḌā jise dekho vo nagar kaisā hai

apne riste hue zaḳhmoñ pe chhiḌak letā huuñ
raakh jhaḌtī hai jo ehsās ke añgāroñ se

vo sarmadī sā hasīñ tarannum latīf hoñToñ kā ik tabassum
mujhe ye ehsās kyoñ hai paiham ki jaise kuchh kho gayā hai merā

aañkh se niklā to ik sail-e-ravāñ ho jā.egā
varna ehsās-e-mohabbat rā.egāñ ho jā.egā

mire andar ka.ī ehsās patthar ho rahe haiñ
ye shīrāza bikharnā ab zarūrī ho gayā hai

tumhāre ġham meñ koī aañkh nam nahīñ hogī
havā ke karb kā ehsās kis ko hotā hai

be-ruḳhī us kī dilātī hai jahāñ kā ehsās
liye duniyā kī ḳhabar be-ḳhabar aatā hai koī

ajiib hotā hai ehsās kā talavvun bhī
abhī ḳhushī kī ḳhushī thii, abhī malāl kī hai

mire ehsās ko kis shak ne jakḌā hai
yahī kyuuñ sochtā huuñ ab to pahle sā nahīñ hai

mirī palkoñ se kuchh ummīdeñ aañsū ban ke yuuñ jhaḌtī haiñ jaise sūkhe patte shāḳh se jhaḌte haiñ patjhaḌ meñ
mere ehsās aur jazbāt bachchoñ kī tarah rote bilakte haiñ

hai ye bhī dūsroñ ko pyaas kā ehsās shāyad
suhānī rut hai aur maiñ tark-e-bāda kar rahā huuñ

maiñ ki jaisā huuñ ba-har-hāl nazar meñ aatā
mujh ko ehsās kī nazroñ se to dekhā hotā

koī marte hue lamhoñ kā masīhā hotā
karb tanhā.ī kā ehsās na itnā hotā

maujoñ kā iztirāb ho yā gauhar-e-hayāt
ehsās kā fusūñ hai samundar meñ kuchh nahīñ

apnī hañstī kā bhī ehsās jahāñ ho na sake
ālam-e-hosh meñ ik vo bhī maqām aatā hai

bujhī nahīñ abhī ye pyaas bhī ġhanīmat hai
zabāñ pe kāñToñ kā ehsās bhī ġhanīmat hai

'shakīl' ehsās hai mujh ko har ik mauzūñ tabī.at kā
ġhazal paḌhne se pahle rañg-e-mahfil dekh letā huuñ