Tags-Ehsaas

kar lo ayādat us kī tum bhī to 'farhat-ehsās'
duniyā bahut dinoñ se bīmār chal rahī hai

ye alag baat ki ho jā.ūñ mohabbat meñ tabāh
tū na mujh ko kabhī ehsās-e-tabāhī denā

sher kahne kī ġharaz se maiñ ne aksar rāt-bhar
phuul se ehsās ko rakkhā hai nok-e-ḳhār par

chaman meñ laa.ī hai phūloñ kī aarzū tujh ko
milā kahāñ se ye ehsās-e-rañg-o-bū tujh ko

ye to mahfil na huī maqtal-e-ehsās huā
aa.ina de ke mujhe le gayā chehra koī

ā.īna-e-ehsās ḳhad-o-ḳhāl hasīñ haiñ
tāsīr-e-vafā rañg-e-ruḳh-e-yār se pūchho

in meñ kyā farq hai ab is kā bhī ehsās nahīñ
dard aur dil kā zarā dekhiye yaksāñ honā

kyā kahūñ jazbāt kā tūfān kitnā tez hai
dil ba-hadd-e-be-ḳhudī ehsās se labrez hai

mujhe ehsās ye pal pal rahā hai
ki mere sar se sūraj Dhal rahā hai

tum 'farhat-ehsās' bas apne aap ko marne mat denā
taaki daftar-e-duniyā meñ daḳhl-e-insānī kam na paḌe

na vo mire dil se bā-ḳhabar the na un ko ehsās-e-ārzū thā
magar nizām-e-vafā thā qaa.em kushūd-e-rāz-e-nihāñ se pahle

toḌ bhī do ehsās ke rishte chhoḌ bhī do dukh apnāne
ro ro ke jīvan kāTo.ge ro ro ke mar jāoge

kyā qayāmat hai vo qātil mujh meñ
mere ehsās kī sūrat Thahre

kuchh sulagte hue ḳhvāboñ kī farāvānī hai
shahr-e-ehsās meñ ā.inda kī tābānī hai

apnī āvāz pe ham chauñk uThe haiñ ḳhud bhī
ik zarā lahja-e-ehsās agar badlā hai

phir lauT ke aayā huuñ tanhā.ī ke jañgal meñ
ik shahar-e-tasavvur hai ehsās ke har-pal meñ

'farhat-ehsās' to ham ḳhud hī bane haiñ varna
farhat-ullāh ne kabhī is kī ijāzat nahīñ dī

ehsās-e-zimmedārī bedār ho rahā hai
har shaḳhs apne qad kā mīnār ho rahā hai

ab jaan pe ban aa.ī to ehsās huā hai
jo dekh rahe the vo tamāshā hī nahīñ thā

māthe par shikan koī na ehsās-e-nadāmt
vo kaTte saroñ ko kabhī gintā hī nahīñ thā