Tags-Ehsaas

ḳhushk āñkhoñ meñ utar aatā hai bādal ban kar
dard ehsās ko banjar nahīñ rahne detā

junūñ ne barpā kiyā hai sahrā meñ shahr kī ta.aziyat kā jalsa
to 'farhat-ehsās' bhī ba-chashm-e-pur-āb tayyār ho rahā hai

ā.inda 'farhat-ehsās'
mayyat hai tayyār mirī

un ke dil par mirā ehsās-e-sitam bhī hai garāñ
ġhair kī sho.ala-bayānī kā gilā kuchh bhī nahīñ

dekhā jo us kā dast-e-hinā.ī qarīb se
ehsās gūñjtī huī shahnā.ī ban gayā

vo kareñ yā na kareñ apnī jafā se tauba
mere dil ko magar ehsās-e-peshemānī hai

har-chand ġham bhī thā magar ehsās-e-ġham na thā
darmāñ na thā to mātam-e-darmāñ na thā kabhī

apne andar chhupe hue dushman kā hai ehsās jinheñ
merī tarah vo log bhī apne aap se Darte rahte haiñ

mahfūz rahegā kyā ehsās kā ā.īna
patthar ke muqābil hai almās kā ā.īna

soz-e-'mānī' kā zamāne meñ hai kis ko ehsās
aaj phir dard mire pahlū meñ bekār uThā

ḳhud ko bhūle hue guzre haiñ zamāne yaaro
ab mujhe tum mirā ehsās dilāte kyuuñ ho

kitne hī log sāhib-e-ehsās ho ga.e
ik be-navā kī chīḳh baḌā kaam kar ga.ī

us ko ḳhabar huī to badal jā.egā vo rañg
ehsās tak na us ko dilā aur dekh le

phuul kī ik zarb se aañsū nikal aa.e mire
ek halkī baat kā ehsās bojhal ho gayā

jazba-e-shauq kī takmīl nahīñ ho saktī
zindagī maut hai ehsās-e-masarrat ke baġhair

koī do-chār nahīñ mahv-e-tamāshā sab haiñ
mere ehsās kī āvāz pe zinda sab haiñ

dard aisā diyā ehsās-e-vafā ne ham ko
na davā ne hī shifā dī na duā ne ham ko

ab daulat-e-dil haar ke rotā hai 'muzaffar'
muflis ko ye ehsās-e-ziyāñ maar na Daale

tū ḳhvāb hai ehsās hai naġhma hai ki gul hai
ye kashmakash-e-vahm-o-gumāñ maar na Daale

ehsās kā qissa hai sunānā to paḌegā
har zaḳhm ko ab phuul banānā to paḌegā