Tags-Ehsaas

har shai hai nā-tamām ye ehsās kyuuñ hai aaj
har aib se javāz-e-hunar kaun le gayā

itne badle ga.e ādāb ki ab mahfil meñ
dil kī dhaḌkan pe bhī ehsās-e-sazā hotā hai

ġham-zado dā.era-e-ġham se nikal kar dekho
dard se dard kā ehsās baḌā hotā hai

ye ḳhud-e-farebi-e-ehsās-e-ārzū to nahīñ
tirī talāsh kahīñ apnī justujū to nahīñ

talḳhī kā ehsās miTā de duniyā se
yā-rab tū har peḌ kā phal mīThā kar de

zindagī kā diyā huā chehrā ishq-dariyā meñ dho ke aa.e haiñ
'farhatūllāh'-ḳhāñ ga.e the vahāñ farhat-ehsās ho ke aa.e haiñ

mere ehsās ko ik phuul bahut hai 'ḳhāvar'
mere ehsās pe yuuñ sañg na barsāyā kar

rag-e-ehsās meñ nashtar TuuTā
haath se chhūT ke sāġhar TuuTā

dafan huuñ ehsās kī sadiyoñ purānī qabr meñ
zindagī ik zaḳhm hai aur zaḳhm bhī taaza nahīñ

samā.at meñ to apnī quvvat-e-ehsās paidā kar
mire dil ke taḌapne kī tujhe āvāz aa.egī

be-sadā gumbad-e-ehsās huā mohr-ba-lab
phuul ke dard kā qissa koī kāñTā jaane

māyūs na ho be-ruḳhī-e-chashm-e-jahāñ se
shā.ista-e-ehsās koī kaam kiye jā

kyuuñ ek ḳhvāb ko āñkhoñ meñ le ke phirtā hai
kyuuñ ek dard kā ehsās kū-ba-kū hai use

umr bhar Dartā rahā kam-zarfī-e-ehsās se
un ke pahlū meñ bhī merī ruuh ghabrā.ī bahut

ik na ik roz samundar kā safar karnā hai
apne ehsās ke mahdūd jazīroñ se nikal

tire hone kā tujhe bhī to ho ehsās koī
ek koñpal kī tarah apnī hī shāḳhoñ se nikal

ehsās kī ḳhalish se tanhā.ī kī tapish se
rishtoñ kī tāzgī ho tar-dāmanī se dāman

koī ro.e yā hañse 'parvāz' mujh ko ġham nahīñ
maiñ to zinda huuñ mirā ehsās-e-dil zinda nahīñ

pinhāñ thā laġhzishoñ meñ bhī ehsās-e-āgahī
maiñ kyā sambhal gayā ki zamāna sambhal gayā

mire ehsās meñ bechain jis ke ḳhāl-o-ḳhad haiñ
use har aañkh meñ tasvīr karne jā rahā huuñ