Tags-Ehsaas

mirā ehsās to tere karam se
mire marne se pahle mar gayā thā

yahāñ hai rishta-e-anfās meñ tarannum-e-dost
yahāñ latāfat-e-ehsās se ziyāñ hai na suud

bas isī ehsās kī shiddat ne būḌhā kar diyā
TūTe-phūTe ghar meñ ik laḌkī siyānī aur hai

ġham se ehsās kā ā.īna jilā paatā hai
aur ġham sīkhe hai aa kar ye salīqa mujh se

tujh ko haq-talfī kā ye ehsās kyoñ hone lagā
saare andhe bāñTte haiñ revḌī pahchān kar

tesha-e-fikr vahī nashtar-e-ehsās vahī
zaḳhm-e-sar hai ki jo thā zaḳhm-e-jigar hai ki jo thā

shiddat-e-ehsās-e-tanhā.ī na pūchh
ham bharī mahfil meñ ghabrāte rahe

yahāñ jo kuchh bhī hai vo partav-e-ehsās hai saaqī
ba-juz baada javāb-e-gardish-e-ayyām kyā hogā

jab qaum par aafat aa.ī ho jab mulk paḌā ho mushkil meñ
insān vo kyā mar miTne kā ehsās na ho jis ke dil meñ

ab ye ehsās hamesha mujhe hotā hai dost
mujh meñ ik shaḳhs talabgār udāsī kā hai

ḳhayāl-e-nau se ulajhtā huā mirā ehsās
mirī ġhazal ke safar kā bayān ban baiThā

maiñ jism huuñ ki koī ruuh yā faqat ehsās
mirā vajūd ḳhud ik imtihān ban baiThā

har saañs meñ ehsās-e-farāvāñ kī kahānī
ḳhāmoshi-e-mahbūb meñ ik sail-e-ma.ānī

bāhar jo nahīñ thā to koī baat nahīñ thī
ehsās-e-nadāmt magar andar bhī nahīñ thā

piilī sāñseñ bhūrī āñkheñ surḳh nigāheñ
unnābī ehsās tabī.at tārīḳhī hai

ḳhushk lamhāt ke dariyā meñ bahā de mujh ko
marg-e-ehsās kī suulī pe chaḌhā de mujh ko

koī tanhā.ī kā ehsās dilātā hai mujhe
maiñ bahut duur huuñ nazdīk bulātā hai mujhe

mujhe pathrīle ehsās ke pañghoḌoñ meñ khilāyā gayā
sikhā.ī ga.ī be-tartīb zindagī kī bandar-bāñT

uTh gayā dūrī-e-manzil kī thakan kā ehsās
raah kuchh aur kaThin ho ga.ī manzil ke qarīb

maiñ ne ḳhaas ashkoñ ko motī kī tarah rakkhā hai
un ko ehsās ke dhāge meñ piro le koī