Tags-Ehsaas

minnat-kash-e-ehsās kahāñ chain milegā
minnat mirī sadiyoñ ne baḌhā lī hai to kyā hai

nañg-e-ehsās hai andoh-e-ġharīb-ul-vatanī
kam nahīñ gard-e-rah-e-shauq kī sāya-faganī

mārne ke liye hathiyār zarūrī to nahīñ
ham to ehsās kī shiddat se hī mar jaate haiñ

ehsās kī Daalī par ik phuul mahaktā hai
zulfoñ ke liye tum ne ik roz chunā hotā

burrish-e-teġh-e-adā-e-dost kā ehsās hai
ab rahīn-e-minnat-e-tīr-e-qazā koī nahīñ

aag pe chalte chalte ab to ye ehsās bhī kho baiThe
kyā hogā zaḳhmoñ kā mudāvā dāman kaise bachā.eñge

na ehsās-e-mālik na ehsās-e-ḳhidmat
maqām aa gayā bandagī se bhī aage

jab pahle-pahal ehsās huā hai ġham kā to dil aisā kāñpā
jaise ki dulhan pahlī shab kī aahaT jo mile tharrā jaa.e

sitam hai 'kāzmī' ghar meñ bhī ab sabhī lamhe
garāñ guzarte haiñ ehsās par safar kī tarah

shahr-e-be-mehr meñ zinda thā faqat maiñ 'sāhil'
mere ehsās kā qātil mirī poshāk meñ hai

ḳhuuñ ho ke agarche dil-e-sad-chāk bhī Tapkā
hāthoñ meñ va-lekin rag-e-ehsās na aa.ī

umr kī Dhaltī huī dopahar meñ
ThanDī havā ke jhoñke kā ehsās bhī

mauhūm nazar aatā hai ab josh-e-mulāqāt
kuchh garmi-e-ehsās ghaTā dī ga.ī shāyad

jin se zinda the zamīr-o-ehsās
ab vo andar kī malāmat bhī ga.ī

kabhī jab farhat-ehsās apnā afsāna sunāte haiñ
use apnī haqīqat kā alam bhī karte rahte haiñ

aañkh meñ aañsū haiñ ehsās-e-masarrat dil meñ hai
ek firdaus-e-nazāra aap kī mahfil meñ hai

fikr jaise ā.ina-dar-ā.ina raushan charāġh
tīrgī mere liye ehsās-e-ra.anā.ī bhī hai

chāñdnī raat ne ehsās dilāyā hai 'malāl'
aadmī kitne sarāboñ meñ ghirā hotā hai

amal ke vaqt ye ehsās rahtā hai hamesha
mire andar se apnī aañkh mujh ko dekhtī hai

ab tirī god ke pāloñ meñ bhī ehsās nahīñ
bas yahī soch ke gaañv se ulajh baiThā huuñ