Tags-Ehsaas

judā.ī to muqaddar thī mujhe ehsās thā lekin
kaf-e-ummīd par phir bhī sharāra rakh liyā maiñ ne

kis bebasī ke saath basar kar rahā hai umr
insān musht-e-ḳhāk kā ehsās liye hue

use ehsās hai kyā 'mīt' vo ab
mire armāñ kuchaltā jā rahā hai

vo nahīñ paas to ehsās-e-rifāqat hai sivā
ġham-e-tanhā.ī ke zindāñ meñ maiñ tanhā bhī nahīñ

phailā huā hai kamre meñ ehsās-e-be-hisī
ḳhāmoshiyoñ se be-suḳhanī ham-kalām hai

ai dil ai ḳhushiyoñ ke madfan ai mere ġhamoñ ke tāj-mahal
le ḳhush ho terī ziyārat ko ehsās ke maare aate haiñ

yuuñ to hai 'irfān' har ehsās hī mahdūd sā
ik kasak sī hai ki jo be-intihā maujūd hai

aao ham hañste uTheñ bazm-e-dil-āzārāñ se
kaun ehsās ko bīmār banā kar uTThe

ehsās par garāñ rahā ehsās kā tilism
ye umr kī takān safar tak nahīñ rahī

mirā jaal ḳhālī
magar dil masarrat ke ehsās se bhar gayā

qalam dil meñ Dubo kar bhī 'mujībī' kuchh na haath aayā
ye vo ehsās hai jis kī pashemānī na jā.egī

roz-o-shab lagtā rahe sochoñ kā mela zehn meñ
shor se ḳhālī kabhī ehsās kā jañgal na ho

zehn ḳhālī ho ga.e haiñ vaqt ke ehsās se
sāmne vo mas.ala rakh jis kā koī hal na ho

hai safar darpesh to parchhā.īñ kī uñglī pakaḌ
raah meñ tanhā.ī ke ehsās se pāgal na ho

vo zulm bhī ab zulm kī had tak nahīñ karte
āḳhir unheñ kis baat kā ehsās huā hai

kabhī tanhā.ī kā ehsās nahīñ rahtā hai
duur rah ke bhī vo is dil ke qarīñ rahtā hai

barbat-e-dil ke mire naġhme nahīñ sho.ale haiñ ye
garmī-e-ehsās se duniyā ko garmātā huuñ maiñ

ik ḳhvāb-numā bedārī meñ jaate hue us ko dekhā thā
ehsās kī lahroñ meñ ab tak hairat kā safīna bahtā hai

ab yahī sho.ale mirī fikr-o-nazar meñ Dhal kar
husn-e-ehsās kā shahkār nazar aate haiñ

mere ālām kā darmāñ tirī āñkhoñ meñ nahīñ
apne ehsās ko siine meñ tapāñ rakkhūñgā