Tags-Ehsaas

achchhī nahīñ nazākat-e-ehsās is qadar
shīsha agar banoge to patthar bhī aa.egā

'at.har' tum ne ishq kiyā kuchh tum bhī kaho kyā haal huā
koī nayā ehsās milā yā sab jaisā ahvāl huā

ik gharānā jo hai pahchān mire hone kī
un rivāyāt kā ehsās sadā rahtā hai

'riyāz' ehsās-e-ḳhuddārī pe kitnī choT lagtī hai
kisī ke paas jab jaatā hai koī mudda.ā le kar

jis meñ ehsās ho asīrī kā
vo rihā.ī koī rihā.ī hai

ziist ke dard kā ehsās kabhī miT na sakā
sin ḳhushī ke bhī kaTe ik ġham-e-be-nām ke saath

sarmāya-e-hastī thā kabhī josh-e-taġhazzul
ehsās-e-junūñ aur thā andāz-e-bayāñ aur

soz-e-dil-o-jāñ aur hai sāz-e-dil-o-jāñ aur
ehsās-e-bayāñ aur hai idrāk-e-nihāñ aur

kis ko shab-e-hijrāñ kī girānī kā ho ehsās
jab din chaḌhe bāzār meñ taarā nazar aa.e

ik taraf soch ik taraf ehsās
do girohoñ meñ baT gayā huuñ maiñ

paas rahā to qurbat kā ehsās na thā
us ne jaane kī Thānī to kaañp ga.ī

mujh ko ehsās hai tum bhī merī tarah jān-o-dil kū-e-ulfat meñ haar aa.e ho
ab ye baazī na.e sar se mumkin nahīñ apnā anjām ḳhud soch lo dosto

thakan kā ehsās ho to kar lenā yaad us ko
adhūre ḳhvāboñ kī sar-phirī kā.enāt likhnā

sub.h ke saath khulī aañkh to ehsās huā
mere siine meñ koī chiiz thī jo TuuT ga.ī

khīñch laayā tujhe ehsās-e-tahaffuz mujh tak
ham-safar hone kā terā bhī irāda kab thā

jis kā ma.abūd hai chaḌhtā huā sūraj 'bedī'
us ko ehsās añdhere kā dilāyā jaa.e

thā tujh se bichhaḌ jaane kā ehsās magar ab
jiine ke liye aur sahāre nikal aa.e

vo mire paas haiñ ehsās ye hotā hai zarūr
is qadar duur haiñ nazdīk rag-e-jāñ ho kar

TuuT ke hī ehsās mujhe ye ho paayā
dard abhī kuchh aur sahā jā saktā hai

alag haiñ nazreñ alag nazāre ajab haiñ rāz-o-niyāz saare
kisī ke jazbe chamak rahe haiñ kisī kā ehsās mar rahā hai