Tags-Ehsaas

kaun thā jo mire ehsās ko raushan kartā
umr bhar sirf mirā dil hī jalā hai mujh meñ

vo kyā kyā baat kartā hai na ik pal bhī bichhaḌne kī
magar lahja ki ehsās-e-judā.ī saaf detā hai

afkār ke jigar meñ raqsāñ rafū kī ḳhvāhish
ehsās ke subū meñ jaise numū kī ḳhvāhish

mujh ko ehsās-e-rañg-o-bū na huā
yuuñ bhī akasr bahār aa.ī hai

kuchh be-tartīb sitāroñ ko palkoñ ne kiyā tasḳhīr to kyā
vo shaḳhs nazar bhar ruk na sakā ehsās thā dāman-gīr to kyā

kahtī huī ye mujh se havā-e-sahar ga.ī
dasht-e-talab meñ shabnam-e-ehsās mar ga.ī

jabr ke ehsās kī āvāz to pahle bhī thī
inqalāb-e-qismat-e-ādam kā āvāza na thā

ye zabānñ-bandī-e-ehsās ye jabr hālāt
jurm hai khole agar dīda-e-bedār koī

maiñ rahā garche har ehsās pe masrūf-e-sujūd
koī sajda bhī tirī shaan ke shāyāñ na huā

vaqt ke saath fuzūñ hotā hai ehsās-e-ziyāñ
fahm-o-idrāk hī ġhārat-gar-e-insāñ hai to kyā

yahī hai vaqt bolo 'farhat-ehsās'
ki har jānib kamīne bolte haiñ

ḳhud-farebī baḌh ke jab bantī hai ehsās-e-shu.ūr
jab javāñ hotā hai ahl-e-zar ke tevar meñ ġhurūr

jaltī huī sham.oñ ne aksar ehsās kī raakh ko bhaḌkāyā
qurbat meñ damakte chehroñ kī tanhā.ī ke dukh yaad aa.e haiñ

ehsās-e-rqābat se jabīnoñ ko bachāo
Takrā.eñge sajde to koī dar na bachegā

ab nahīñ hotā mujhe ehsās kuchh
maiñ huuñ ab pahle se behtar TuuT kar

ho chuke haiñ ḳhushk sab ehsās ke sote magar
qalb-e-shā.ir hai jo thoḌī sī namī pā jaa.e hai

mad-hoshī meñ ehsās ke ūñche ziine se gir jaane de
is vaqt na mujh ko thaam ki saaqī raat guzarne vaalī hai

raat añdherī ho to jugnū kī chamak kaafī hai
shart itnī hai ki ehsās jagā kar chaliye

vo pyaas hai miTTī pe zabāñ pher rahe haiñ
ham aa.e haiñ ehsās ke sho.aloñ se nikal kar

har fat.h ke ġhurūr meñ be-vaj.h be-sabab
ehsāh-e-infi.āl-e-hazīmat kahāñ se laa.eñ