Tags-Ehsaas

regzār-e-hijr meñ ehsās ke zamzam nihāñ
is jagah to tishnagī kā silsila kuchh aur hai

hijr kā qissa bahut lambā nahīñ bas raat bhar hai
ek sannāTā magar chhāyā huā ehsās par hai

haqā.eq par jamī hai gard-e-bātil
hai gum vahmoñ meñ ehsās-e-yaqīñ bhī

aaj is baat kā ehsās huā hai mujh ko
ḳhvāb 'mohsin' the mire sirf bikharne ke liye

log apne andāzoñ kī jūtiyāñ
mere ehsās ke darvāze pe utārte haiñ

jo mere ham-sinoñ se baḌā kar gayā mujhe
ehsās kā vo din bhī mahīne ke biich thā

aur kyā hotā ziyāda is se ehsās-e-vafā
sham.a ke dāman meñ koī shart parvāne kī hai

mujhe vo shiddat-e-ehsās de ki dekh sukūñ
tujhe qarīb se aur minnat-e-nazar ke baġhair

safar kī ye kaisī vus.ateñ haiñ ki rāsta hai na koī manzil
thakan kā ehsās bhī na utre qadam qadam rahguzār māñge

chauñk uThtā hai ġham-e-hijr kā ehsās 'rishī'
un ke aane pe bhī taskīn kahāñ hotī hai

vo pichhlī shab ko apne ruḳh se jab pardā uThāte haiñ
mirā ehsās shāhid hai do-ālam jhuum jaate haiñ

har sadā se bach ke vo ehsās-e-tanhā.ī meñ hai
apne hī dīvār-o-dar meñ gūñjtā rah jā.egā

tujh se bichhaḌ ke zindagī ho jā.egī tavīl
ehsās ke nikhār kā mausam na aa.egā

dekh lete haiñ andhere meñ bhī rasta apnā
sham.a ehsās ke mānind jalī rahtī hai

fankār kā ehsās-e-ziyā-bār thā jis meñ
hālāt ne vo shīsh-mahal toḌ diyā hai

dil umr ke qānūn kā qaa.il nahīñ varna
ehsās use bhī hai ki vo mujh se baḌī hai

aur ehsās-e-jihālat baḌh gayā
kis qadar paḌh likh ke jāhil ho ga.e

tā-dil meñ tumhāre bhī na ehsās-e-vafā ho
jī bhar ke mujhe aaj satāo ki chalā maiñ

tumhāre qurb kā ehsās dilbar
mirī dhaḌkan baḌhā.e jā rahā hai

vo rūThne aur manāne kā ehsās abhī tak baaqī hai
kyā kyā the us ke qaul-o-qasam kuchh yaad rahā kuchh bhuul ga.e