Tags-Ehsaas

ek saa.e kā hai ehsās mire sar pe sadā
kaun sochegā kabhī ḳhud se ḳhudā ho jaanā

nazar nazar meñ bahār-e-nigāh naġhma-e-ba-dosh
nafas nafas meñ ik ehsā-e-dard naġhma-tarāz

maiñ aur ye namkīn-e-ġham-e-ishq are tauba
tū aur ye ehsās-e-girāñ-bār-e-mohabbat!

ThanDī havā ke lams kā ehsās thā ajiib
maiñ der tak shajar kī tarah jhūmtā rahā

husn utnā ek paikar maiñ simaT saktā nahīñ
tū bhī mere hī kisī ehsās kī tasvīr hai

kamāl-e-dīvāngī to jab hai rahe na ehsās-e-jaib-o-dāman
agar hai ehsās-e-jaib-o-dāman to phir junūñ hoshiyār sā hai

us ke sitam-o-jaur kā ehsās kise ho
us shoḳh kī sūrat hī baḌī hosh-rubā hai

ehsās baḌh rahā hai huqūq-e-hayāt kā
paidā.eshī huqūq sitam-parvarī kī ḳhair

chāñdnī raat meñ har dard sañvar jaatā hai
jaane kyā kyā sar-e-ehsās bikhar jaatā hai

hai mustaqil yahī ehsās kuchh kamī sī hai
talāsh meñ hai nazar dil meñ bekalī sī hai

jism ehsās ke chaTaḳh jaa.eñ
aise but kāñch kī dukān meñ rakh

nahīñ rahā maiñ tire rāste kā patthar bhī
vo din bhī the tire ehsās meñ ḳhudā thā maiñ

ehsās kī qindīl se az.hān haiñ raushan
lekin ye ujālā bhī jo kajlā.e to kyā ho

jab mil gayā irfān-e-nazar mujh ko ḳhudā se
phir kyuuñ mire ehsās se mahshar nahīñ utrā

dil ke har mausam ne baḳhshī daulat-e-ehsās-o-dard
sirf is sarmā.e ko zād-e-safar rahne diyā

ab ye ehsās ki duniyā meñ koī merā nahīñ
jaane kab mujh ko samundar ke havāle kar de

yuuñ bhī ik baar to hotā ki samundar bahtā
koī ehsās to dariyā kī anā kā hotā

kyā adū kyā dost sab ko bhā ga.iiñ rusvā.iyāñ
kaun aa kar nāptā ehsās kī pahnā.iyāñ

lamha lamha tire ehsās ne karvaT badlī
raat ḳhvāboñ pe jamī gard haTā lī ham ne

kyuuñ rahā ġhairiyat kā sā ehsās
jab bhī ham us se kam kanār hue