Tags-Ehsaas

qurb hī kam hai na duurī hī ziyāda lekin
aaj vo rabt kā ehsās kahāñ hai ki jo thā

kisī ko kyā ḳhabar ehsās hai lekin mire dil ko
ki us ke pyaar kī barsāt mere dasht-e-jāñ tak hai

kuchal detī hai jab ehsās ko sanjīdgī ġham kī
sharārat se mirā dil gudgudāne kaun aatā hai

tujh ko kho dene kā ehsās huā tere ba.ad
DhūñDhtā phirtā huuñ ab terā pata tere ba.ad

phailī huī hai chāñdnī ehsās meñ mire
ye kaun merī zaat ke andar utar gayā

kabhī ehsās kā ik ḳhaar chubh jaa.e to ro uTThūñ
kabhī maiñ daar ke taḳhte pe chaḌh kar muskurātā huuñ

ehsās kī zabāñ ko luġhat se nikāl kar
ma.anī kī sarhadoñ se guzar jaanā chāhiye

phuul se baas judā fikr se ehsās judā
fard se TuuT ga.e fard qabīle na rahe

ruuh meñ jis ne bharī urdu ke be-jāñ jaam meñ
kaif-e-ehsās-e-amal hai jis ke har paiġhām meñ

tere har pahlū meñ haiñ ehsās kī bedāriyāñ
tere har manzar meñ haiñ jazbāt kī sarshāriyāñ

nafas nafas pe ye ehsās-e-ġham ye majbūrī
ḳhudā-gavāh qayāmat hai zindagī kyā hai

na.ī umañgoñ ko saath le kar ravāñ huuñ phir jāda-e-vafā par
magar hai ehsās-e-nā-murādī ki sahmā sahmā sā har-qadam hai

be-sukūñ lamhoñ meñ sonā hai girāñ ehsās kā
qarz hai ta.abīr un kī jo udhāre ḳhvāb haiñ

shiddat-e-ehsās-e-tauba kā vo aalam hai 'urūj'
jaam mere sāmne hai maiñ ḳhudā ke sāmne

khīñch letā hai dāman-e-ehsās
phuul kī be-zabāniyoñ pe na jā

duniyā kī har bulandī ko hai terā intizār
ehsās-e-nā-rasā.ī kī gardan maroḌ tū

nālāñ huuñ maiñ bedārī-e-ehsās ke hāthoñ
duniyā mire afkār kī duniyā nahīñ hotī

jaane kis ehsās ne aage nahīñ baḌhne diyā thā
ab paḌā huuñ qaid maiñ raste ke patthar meñ akelā

le ke jā.ūñ kahāñ ehsās-e-vafādārī ko
dil to kahtā hai ki maiñ bhī tire jaisā ho jā.ūñ

merā ā.īna-e-ehsās shikasta thā agar
sūrat-e-hāl mirī tū hī batā kaisī thī