Tags-Ehsaas

apnī tasvīr banāoge to hogā ehsās
kitnā dushvār hai ḳhud ko koī chehrā denā

bhañvar meñ merī kashtī ko yahī ehsās rahtā hai
Dubone meñ mirā ye nāḳhudā shāmil na ho jaa.e

talḳhī kā naza.a kī to kuchh ehsās ho sake
itnī to mere muñh meñ ho talḳhī sharāb kī

jis ko ehsās ho aflāk kī tanhā.ī kā
der tak us ko akelā nahīñ rahne dete

dil thā ehsās-mund pahlū meñ
husn se ijtināb kyā karte

mujh ko ehsās bartarī kā huā
rif.atoñ ko jab ik nazar dekhā

har naqsh havā ho ke bikhar jā.egā āḳhir
'ḳhālid' tirā ehsās bhī mar jā.egā āḳhir

jab bhī ehsās kā sūraj Duube
ḳhaak kā Dher bashar kuchh bhī nahīñ

kamāl-e-dīvāngī to jab hai rahe na ehsās-e-jaib-o-dāman
agar hai ehsās-e-jaib-o-dāman to phir junūñ hoshiyār sā hai

sivā hai had se ab ehsās kī girānī bhī
girāñ guzarne lagī un kī mehrbānī bhī

ik aag sī jaltī rahī tā-umr lahū meñ
ham apne hī ehsās meñ pakte rahe tā-der

ye aur baat hai māhaul sāzgār na ho
shikasta barbat-e-ehsās be-sadā to nahīñ

kāsa-e-jism banā baiThā hai jab dekho
ye farhat-ehsās ajiib bhikārī hai

har saañs mahaktā huā ehsās hai zinda
dil meñ tire milne kī abhī aas hai zinda

hai karb kā ehsās jo jiine nahīñ detā
nā-karda gunāhī kī sazā aur hī kuchh hai

ehsās kī aag se guzar kar
kuchh aur bhī ḳhaam ho gayā maiñ

ġham kā ehsās javāñ ho to ġhazal hotī hai
ishq maa.il ba fuġhāñ ho to ġhazal hotī hai

tujh se hālāt ke patthar na sahe jā.eñge
apne ehsās kā ā.īna banā le mujh ko

itnā ehsās to de pālne vaale mujh ko
maiñ sambhal jā.ūñ agar koī sambhāle mujh ko

kar diyā aap kī qurbat ne bahut duur mujhe
aap se buad kā ehsās na itnā thā kabhī